Azərbaycan, Bakı, 12 aprel /Trend, müxbir A.Axundov/
Azərbaycanın 2011-ci il üçün dövlət büdcəsinin proqnozlarına düzəlişlər edilərkən, əsas diqqət əhalinin sosial müdafiəsinin yaxşılaşdırılmasına yönəldiləcək. Bu barədə çərşənbə axşamı jurnalistlərə maliyyə nazirinin müavini Azər Bayramov deyib.
Onun sözlərinə görə, qanunvericiliyə əsasən, Azərbaycanın 2011-ci il üçün dövlət büdcəsinin proqnozlarına düzəlişlər layihəsinə mayın 15-dən sonra Milli Məclisdə baxıla bilər.
"Bi istiqamətdə təkliflərdən biri minimal əməkhaqqının artrılmasıdır. Bu halda bütün büdcə təşkilatlarının işçilərinin əməkhaqqı və əmək pensiyasının baza hissəsi artırıla bilər", - Bayramov əlavə edib.
Onun szölərinə görə, indi ayrı-ayrı nazirliklərdən daxil olan təkliflər üzərində iş aparılır.
2011-ci il üçün dövlət büdcəsinə proqnozlara düzəlişlər çərçivəsində neftin qiymətinin bir barel üçün indiki 60 dollardan 80 dollaradək artırılması təklif olunur.
Azərbaycanın büdcəsi bir barel neft üçün 60 dollar qiymətinə əsaslanır. Bu halda aprelin 11-də İtaliyanın Auqusta limanında CİF bazasında (alıcının limanında) Azərbaycanın yüngül neftinin qiyməti bir barel üçün 130,13 dollar təşkil edib.
Şimal dənzində hasil edilən etalon növlü Brent Dated-in bir barel neftinin qiyməti aprelin 11-də 126,64 dollar səviyyəsində olub. Bu, əvvəlki qiymətdən 0,22 dollar çoxdur.
Belə artıma baxmayaraq, Azərbaycan büdcə göstəriciləri proqnozlaşdırılan zaman neftin qiymətinin xeyli artırılmasının tərəfdarı deyil.
Dünya bazarlarında neftin qiymətinin artması ilə əlaqədar ölkənin dövlət büdcəsinə daxilolmaların artacağı gözlənilir. Nazir müavininin sözlərinə görə, Azərbaycan Beynəlxalq Əməliyyat Şirkətindən (ABƏŞ) dövlət büdcəsinə əlavə 280 milyon manatın daxil olacağı gözlənilir. ABƏŞ-dən ilkin proqnoz 600 milyon manat səviyyəsində müəyyənləşdirilmişdi. Dövlət Neft Şirkətindən (ARDNŞ) enerji sektorunun borcları silindikdən sonra gəlir vergisinə güzəştlərlə əlaqədar hesablamalar hələ ki davam edir. 2011-ci ildə ARDNŞ-dən daxilolmalar təsdiq edilən proqnozlara əsasən, 680 milyon manat həcmində gözlənilir.
2011-ci il üçün dövlət büdcəsinin gəlirləri 12 061 milyon manat (mərkəzləşdirilmiş gəlirlər - 11 613 958,2 min manat, yerli - 447 041,8 min manat), xərclər 12 748 milyon manat (mərkəzləşdirilmiş xərclər - 11 439 980,0 min manat, yerli xərclər - 1 308 020,0 min manat) məbləğdə təsdiq edilib.
Aprelin 12-nə olan rəsmi məzənnə 0,792 AZN/USD təşkil edir.