Azərbaycan, Bakı, 14 aprel /Trend, müxbir E.İsmayılov/
Bu il Azərbaycanın Nəqliyyat Nazirliyi Bakı-Şamaxı avtomobil yolunun 30 kilometrlik hissəsinin ikizolaqlıdan dördzolaqlıya genişləndirilməsi işlərinə başlayacaq. Bu barədə cümə axşamı Nəqliyyat Nazirliyindəki mənbə bildirib.
Onun sözlərinə görə, Bakı-Şamaxı avtomobil yolunun ümumi uzunluğundan yalnız 15 kilometrlik hissə dördzolaqlıdır, yolun yerdə qalan 100 kilometri isə ikizolaqlıdır.
"Bu il yolun 30 kilometrlik hissəsinin ikizolaqlıdan dördzolaqlıya genişləndirilməsi işlərinə başlanacaq", - mənbə deyib.
Onun sözlərinə görə, yolun bütün hissəsinin genişləndirilməsi üzrə işlər bir neçə il ərzində mərhələli şəkildə həyata keçiriləcək.
Bir müddət əvvəl nəqliyyat nazirinin müavini Musa Pənahovun dediyi kimi, cari ildə Azərbaycanın nəqliyyat sektorunun inkişafına 850 milyon manat vəsait ayrılıb, bu məbləğin əhəmiyyətli hissəsi yol layihələrinin reallaşdırılmasına yönəldiləcək.
