Azərbaycan, Bakı, 14 aprel /Trend, müxbir A.Axundov/
Azərbaycan Sığortaçılar Assosiasiyasının (ASA) təsisçiləri 2011-ci ilin birinci rübündə assosiasiyanın işindən məmnun qaldıqlarını bildiriblər. Bu barədə cümə axşamı Trend-ə ASA Müşahidə Şurasının sədri Azər Əliyev məlumat verib.
ASA-nın fəaliyyətinin yekunlarına assosiasiya təsisçilərinin cümə axşamı keçirilən iclasında baxılıb.
Onun sözlərinə görə, iclasın gedişində birinci rübdə assosiasiyanın fəaliyyəti üzrə hesabata, habelə maliyyə hesabatına, əhali arasında sığortanın təbliği üzrə görülən işlərin hesabatına baxılıb, müzakirə edilib və qəbul olunub.
"İştirakçılar görülən işlərdən razı qalıblar. Birinci rübdə sığortanın təbliği sahəsində, xüsusilə də əhalinin "Sığortanın icbari növləri haqqında" yeni qanun haqqında məlumatlandırılması sahəsində çoxlu işlər görülüb", - Əliyev deyib.
Onun sözlərinə görə, iclas zamanı komitələrin işləri, assosiasiyanın təşkil etdiyi ixtisasartırma kursları haqqında işlər barədə danışılıb.
"İclasın yekunları üzrə qərar qəbul edilməyib, çünki kifayət qədər kvorum olmayıb", - Əliyev qeyd edib.
Ona görə də, onun sözlərinə görə növbəti iclas yaxın iki həftə və ya bir ay ərzində tam tərkibdə keçiriləcək.
"Assosiasiyanın yeni nizamnaməsi üzərində iş bu ilin yayından başlanacaq, orada assosiasiyanın strukturunda dəyişiklər edilməsi nəzərdə tutulub", - Əliyev bildirib.
Azərbaycanda 28 sığorta və bir təkrar sığorta şirkəti fəaliyyət göstərir. Bütün şirkətlər ASA-nın üzvləridir. Sığortaçılar Assosiasiyası 2006-cı ilin dekabrında təsis olunub.