...

Azərbaycanda il ərzində işsizlərin sayı təqribən 3 faiz azalıb

Biznes və iqtisadiyyat xəbərləri Materials 18 Aprel 2011 18:22 (UTC +04:00)

Azərbaycan, Bakı, 18 aprel /Trend, müxbir N.İsmayılova/

Aprelin 1-nə olan vəziyyətə görə, Azərbaycanda işsizlər qismində 39,7 min nəfər rəsmi qeydiyyatdan keçib ki, onlardan 43,3 faizi qadındır. Bu barədə bazar ertəsi Dövlət Statistika Komitəsindən məlumat verilib. Keçən ilin müvafiq dövrü ilə müqayisədə işsizlərin sayı 2,7 faiz azalıb. Ölkədə 1 vakant yerə 4 işsiz iddialıdır.

Hesabat dövrü ərzində ölkənin məşğul əhalisi 4589,8 min nəfər təşkil edib. Bununla yanaşı, cari ilin yanvar-fevral aylarında muzdla işləyənlərin sayı 1370,7 min, dövlət sektorunda 839,9 min, özəl sektorda isə 499,1 min nəfər olub.

İstehsalat sahələrində muzdla işləyənlərin 20,5 faizi sənaye sahəsində, 5,1 faizi tikintidə, 3 faizi kənd, meşə təsərrüfatı və balıqçılıqda çalışır. Xidmətlər sahəsində işləyənlərin 25,8 faizi təhsil sahəsində, 20 faizi topdan və pərakəndə ticarətdə, avtomobillərin, məişət məhsullarının və şəxsi istifadə üçün əşyaların təmirində, 10,1 faizi səhiyyə və sosial xidmətlərdə, 4,7 faizi nəqliyyatda, 1,8 faizi rabitə, 0,6 faizi daşınmaz əmlak, icarə əməliyyatlarında, 4 faizi dövlət idarəsi və müdafiəsi sahəsində, 9 faizi isə başqa sahələrdə cəmlənib.

İşsizliyə görə yardımın orta məbləği 187,7 manat olub ki, ötən ilin müvafiq dövründə bu göstərici 165,8 manat səviyyəsində idi.

Aprelin 18-nə olan rəsmi məzənnə 0,7917 AZN/USD təşkil edir.

Xəbər lenti

Xəbər lenti