Azərbaycan, Bakı, 2 may /Trend, müxbir A.Axundov/
Azərbaycanın İqtisadi İnkişaf Nazirliyi tərəfindən hazırlanan ölkənin 2011-2025-ci illərdə iqtisadi inkişafının uzunmüddətli strategiyasının layihəsi ölkə əhalisinin sayının 2009-cu ildəki 9 milyon nəfərdən 2025-ci ildə 10,7 milyon nəfərə çatacağını proqnozlaşdırır. 2010-cu ilin yekunları üzrə bu göstərici 9,111 milyon nəfər təşkil edib.
Strategiya layihəsinə görə, 2025-ci ildə əhalinin təbii artım göstəricisi 2009-cu ildə olduğu kimi 1,1 faiz səviyyəsində olacaq. Ötən il əhalinin artımı 1,3 faiz təşkil edib.
Bundan əlavə, sosial sığortalanmış şəxslərlə pensiyaçılar arasında nisbətin 2009-cu ildəki 1,4 nəfərdən 2025-ci ildə təxminən 4 nəfərədək artacağı proqnozlaşdırır.
Bu dövr ərzində sosial sahədə aparılması planlaşdırılan tədbirlər sırasına uzunmüddətli perspektivdə sosial sahədə demoqrafik vəziyyətin hərtətəfli qiymətləndirilməsinə əsaslanan dövlət siyasətinin formalaşdırılması, yoxsulluqla mübarizənin davam etdirilməsi, icbari pensiya sığorta sisteminin təkmilləşdirilməsi, pensiyaların toplanmasının daha elastik özəl (özəl pensiya fondları) və dövlət mexanizmlərinin yaradılması, yeni pensiya sığorta sisteminin mərhələli formalaşması daxildir.
Eləcə də aktiv məşğulluq siyasəti əsasında əmək birjasının formalaşdırılması; təhsil sektorunun, əmək bazarının tələblərinə uyğun həssaslığının artırılması, mədəni irsin qorunması üzrə tədbirlərin həyata keçirilməsi; gənclər və idman məsələləri üzrə çevik siyasətin aparılması; demoqrafiya və miqrasiya məsələlərinin effektiv tənzimlənməsi; fərdi uçot sistemi üzrə sığortalanan şəxslərin sayının qeyri-leqal əmək münasibətləri problemlərinin nizamlanması yolu ilə tədricən artırılması; asılılıq əmsalı kimi (əmək qabiliyyətli yaşda olmayan şəxslərin əmək qabiliyyətli yaşda olan şəxslərə nisbəti) parametrlərdə dəyişikliklərin müntəzəm təhlili, əhalinin artımının illik tempi, ümumi doğum əmsalı, əhalinin təkrar istehsal əmsalı nəzərdə tutulur.