Azərbaycan, Bakı, 5 may /Trend, müxbir N.İsmayılova/
Aprel ayında Azərbaycanın vergilər orqanında IDK bank olmayan kredit təşkilatı dövlət qeydiyyatından keçib. Trend-in məlumatına görə, bu barədə Vergilər Nazirliyinin rəsmi saytının "bir pəncərə" bölməsində deyilir.
Təşkilat fiziki şəxs Əliyar Əsgərov tərəfindən yaradılıb. O, şirkərin qanuni nümayəndəsidir. Struktur kommersiya fəaliyyəti üçün dövlət qeydiyyatından aprelin 21-də keçib. BOKT-un nizamnamə kapitalı 300 min manatdır.
Azərbaycan Mərkəzi Bankının "Bank olmayan kredit təşkilatları haqqında" qanun əsasında hazırlanan qaydalarına əsasən, kredit verərkən girov əmanəti qəbul etmək hüququna malik BOKT-ların nizamnamə kapitalına minimal tələb 300 min manat, bu hüququ olmayan kredit təşkilatları üçün isə 30 min manat səviyyəsində müəyyənləşib.
Bu, 2010-cu ildə qanun qüvvəyə mindikdən sonra Azərbaycan Mərkəzi Bankından kredit verərkən girov əmanətinin qəbul edilməsi hüququ ilə lisenziya alan ilk bank olmayan kredit təşkilatı olacaq.
2011-ci ilin birinci rübünün sonuna olan məlumata görə, Azərbaycanda 106 bank olmayan kredit təşkilatı fəaliyyət göstərir. Bu göstərici 2010-cu ilin sonunda 101 olub. Beynəlxalq humanitar təşkilatlar hesabına maliyyələşdirilən kredit təşkilatlarının sayı 18-dir.
Mayın 5-nə olan rəsmi məzənnə 0,7912 AZN/USD təşkil edir.