Azərbaycan, Bakı, 10 may /Trend, müxbir A.Axundov/
Yaz sessiyasının sonunadək Milli Məclis "Sosial xidmətlər haqqında" qanun layihəsini qəbul etməyi planlaşdırır. Trend-in məlumatına görə, bu barədə çərşənbə axşamı jurnalistlərə Parlamentin Sosial siyasət komitəsinin sədri Hadı Rəcəbli məlumat verib.
"Mayın 8-də əlillərin bütün qeyri-hökumət təşkilatları ilə görüşlər keçirdik, onların problemləri və təklifləri müzakirə edildi ki, bunlar bu və ya digər qanunlarımızda öz əksini tapacaq", - Rəcəbli deyib.
Onun sözlərinə görə, "Sosial xidmətlər haqqında" qanun layihəsində yeniliklər ondan ibarətdir ki, Azərbaycanda ilk dəfə sosial xidmətlər təkcə dövlət strukturlarına deyil, qeyri-hökumət təşkilatlarına da göstəriləcək.
"Qanunun qəbul edilməsindən sonra sosial xidmətlərin böyük hissəsini tenderlər vasitəsilə qeyri-hökumət təşkilatları özləri göstərə biləcəklər. Bu təcrübə dünyanın bir çox ölkələrində tətbiq olunur", - Rəcəbli bildirib.
Onun sözlərinə görə, bu qanunun qəbul edilməsi nəticəsində göstərilən sosial xidmətlərin keyfiyyəti yaxşılaşacaq, onların səmərəliliyi yüksələcək, onlar üzərində ictimai nəzarət təmin olunacaq.
"Bundan əlavə, pasientlərin hüquqları ilə yanaşı, həkimlərin hüquqlarının da nəzərə alındığı "Pasiyentlərin hüquqları haqqında" qanun da nəzərdən keçirilir", -Rəcəbli bildirib.