Azərbaycan, Bakı, 16 may /Trend, müxbir N.İsmayılova/
Yanvar-aprel aylarının yekunlarına görə, Azərbaycanda orta aylıq əməkhaqqının məbləği 348,6 manat təşkil edib ki, bu da ötən ilin müvafiq dövr göstəricisindən 12,5 faiz çoxdur. Bu barədə bazar ertəsi Trend-ə Dövlət Statistika Komitəsindən bildirilib.
Ən yüksək əməkhaqqı mədən sənayesində, maliyyə və sığorta fəaliyyəti, informasiya və rabitə, elmi və texniki fəaliyyət sahələrində, eləcə də tikinti sektorunda işləyənlərdə qeydə alınıb.
Yanvar-apreldə adambaşına düşən nominal gəlir 983,4 manat təşkil edib ki, bu da ötən ilin müvafiq dövr göstəricisini 14,5 faiz ötür. Adambaşına düşən real pul gəliri 15,7 faiz artımla 903,6 manat təşkil edib.
Hesabat dövründə orta aylıq əməkhaqqı əhalinin aylıq adambaşına düşən orta pul gəlirlərini 41,8 faiz üstələyib.
Yanvar-apreldə Azərbaycan əhalisinin nominal pul gəliri 8858,9 milyon manat olub ki, bu da ötən ilin göstəricisindən 16 faiz çoxdur. Bu dövrdə əhalinin real pul gəliri 17,2 faiz artımla 8140,1 milyon manata çatıb.
Hesabat dövründə əhali mal alınması və xidmətlərə şəxsi gəlirlərinin 69,9 faizini, vergilər, digər məcburi ödənişlər və könüllü üzvlük haqlarının ödənilməsinə ötən ildəkindən 17,2 faiz çox sərf edib. Ötən il bu, 8,1 milyard manat təşkil etmişdi.
Mayın 16-na olan rəsmi məzənnə 0,7907 AZN/USD təşkil edir.
