Azərbaycan, Bakı, 18 may /Trend, müxbir A.Axundov/
Hazırda Bakının ilkin mənzil bazarında qiymətlər sabitləşir, lakin bu seqmentdə ciddi qiymət azalması gözləməyə dəyməz. Bu barədə çərşənbə axşamı Trend-ə "MBA Group" konsaltinq şirkətinin baş direktoru Nüsrət İbrahimov bildirib.
"Praktiki olaraq yeni binalar tikilmədiyi üçün və satışa çıxarılan binaların sayı azaldığından ciddi qiymət azalması gözləməyə dəyməz", - İbrahimov deyib.
Bununla yanaşı, onun sözlərinə görə, bazarda təklifin tədricən azalmasına baxmayaraq, qiymətlər azalmaya meyilli olacaqlar, lakin bu cüzi olacaq.
"Azalma il ərzində çox deyil, 2-3 faiz təşkil edəcək", - İbrahimov bildirib.
Ekspertin hesablamalarına görə, apreldə ilkin mənzil bazarında qiymətlər 1,3 faiz artaraq bir kvadratmetr üçün 826 dollar təşkil edib. Qiymətlər ilin əvvəlindən 0,2 faiz, ötən ilin müvafiq dövrü ilə müqayisədə isə 1,5 faiz artıb.
"Əmlak Bazarının İştirakçıları" İctimai Birliyinin araşdırmalarına görə, martda Bakıda hələ satılmayan mənzilləri olan hazır yeni tikililərin, eləcə də tikilməkdə olan yeni tikililərin sayı fevraldakı 442-yə qarşı 438 olub.
Martda Bakının ilkin mənzil bazarında qiymətlər əvvəlki ayla müqayisədə 0,8 faiz azalaraq fevraldakı 848 manata nisbətdə 841 manat təşkil edib.
"İlin əvvəlinə nisbətdə qiymətlər 0,8 faiz, ötən ilin müvafiq dövrü ilə müqayisədə 4,4 faiz, böhran dövrü ilə (2008-ci ilin sentyabrı) müqayisədə isə 29,6 faiz azalıb", - qurumun ekspertləri hesab edirlər.
