Azərbaycan, Bakı, 27 may /Trend, müxbir A.Axundov/
Azərbaycanda avtomobil sığortası bazarı böyük potensiala malikdir. Bu barədə cümə günü jurnalistlərə Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov deyib.
"Bu gün Azərbaycanda KASKO üzrə 50 min avtomobil sığortalanıb. Bu, Azərbaycandakı bütün avtomobillərin 6-7 faizini təşkil edir. Bu ondan xəbər verir ki, ölkədə avtomobil sığortasının inkişafı üçüb böyük potensial var", - Xəlilov bildirib.
Onun sözlərinə görə, hazırda məqsəd ölkədəki bütün aktiv avtomobillərın sığortalanmasıdır.
Dövlət Sığorta Nəzarəti Xidmətinin məlumatına görə, 2010-cu ildə sığorta haqlarının ümumi həcmi 155,59 milyon manat təşkil edib. Bunun 36,48 milyon manatı avtonəqliyyat vasitələrinin sığortasının payına düşüb. Bu, ümumi həcmin 23,44 fazini təşkil edir.
2011-ci ilin yanvar-aprelində ölkədə fəaliyyət göstərən bütün şirkətlərin sığorta haqlarının ümumi həcmi 66,34 milyon manat təşkil edib. Bunun 17,39 faizi avtomobil sığortasının payına düşüb.
