Azərbaycan, Bakı, 27 may /Trend, müxbir A.Axundov/
Azərbaycanın su operatoru "Azərsu" dövlət şirkəti istehlakçıların içməli su təchizatının yaxşılaşdırılması məqsədilə Bakının müxtəlif rayonlarına su verilməsi rejiminə dəyişiklik edib. Trend-in məlumatına görə, bu barədə "Azərsu"nun cümə günü yaydığı məlumatda deyilir.
"Səbail rayonunun Badamdar qəsəbəsi və "20-ci sahə" ərazisində əhaliyə əvvəllər günaşırı su verilirdisə, indi istehlakçılar hər gün qrafiklə su ilə təmin olunurlar. Nizami rayonunun Q.Qarayev prospekti və Çobanzadə küçəsində yaşayan abunəçilərin də su təchizatının rejim qrafikinə artım edilib", - məlumatda deyilir.
Məlumata əsasən, Yasamal və Nəsimi rayonlarındakı abunəçilərin 85 faizindən çoxunun mənzilinə daimi su verilir. Halbuki bu göstərici indiyə qədər 60 faizə yaxın idi. Yeni rejimə keçiddən sonra Nərimanov rayonunda daimi su alanların xüsusi çəkisi 75 faizi keçib.
"Bunlarla yanaşı, Bakıxanov və Hövsan qəsəbələrinə verilən suyun həcmi xeyli artırılıb. Əgər əvvəllər Bakıxanov qəsəbəsinə sutka ərzində cəmi 4-5 saat su verilirdisə, artıq bu müddət 10-12 saat təşkil edir. Amma Hövsan qəsəbəsində yeni yaşayış massivləri salınarkən mühəndis kommunikasiyalarının mövcudluğu və gücü nəzərə alınmayıb, "Azərsu" ASC ilə müvafiq razılaşmalar aparılmayıb. Buna görə həmin ərazilərdə paylayıcı şəbəkə yaradılmayıb və bu gün burada yaşayanların içməli su təminatında müəyyən problemlər var", - məlumatda qeyd edilib.
Məlumata əsasən, problemlər "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrası müddətində köklu şəkildə həll olunacaq.
"Qaradağ rayonunun Lökbatan qəsəbəsini içməli su ilə təmin edən magistral kəmərin yenidənqurulmasından sonra bu qəsəbənin sakinlərinin su təminatı da əhəmiyyətli dərəcədə yaxşılaşıb. İndi qəsəbədəki istehlakçıların 80 faizindən çoxu fasiləsiz su alır. Binəqədi, Sabunçu qəsəbələrinin su təchizatının yaxşılaşdırılması istiqamətində də əməli tədbirlərə başlanıb. Qəbul olunmuş təxirəsalınmaz tədbirlər proqramına uyğun olaraq, adıçəkilən qəsəbələrin su təchizatında uzunmüddətli fasilələr aradan qaldırılacaq. Burada yaşayanlar müsbət dəyişiklikləri bu yay hiss edəcəklər", - məlumatda deyilir.