Azərbaycan, Bakı, 31 may /Trend, müxbir N.İsmayılova/
Beynəlxalq Maliyyə Korporasiyasının (BMK) Direktorlar Şurası Azərbaycan bankı "UniBank"-a mikro, kiçik və orta sahibkarlığın (KOS) maliyyələşdirilməsi üçün 10 milyon dollar məbləğində kredit xəttinin ayrılmasını bəyənib. Bu barədə BMK-nın məlumatında deyilir.
Hazırda müvafiq sənədlərin imzalanmasına hazırlıq gedir.
"Unibank" Azərbaycan ərazisində fəaliyyət göstərən 25 filiala malikdir. BMK-nın krediti ölkənin şəhərləri və kənd rayonlarında KOS-un maliyyələşdirilməsi üçün bank portfelinin artırılmasını dəstəkləyəcək. Bu layihə KOS-un maliyyələşdirilməsindən istifadəni yüksəldəcək, korporativ idarəetmənin və depozitlərin cəlb edilməsinin standartlarının tətbiqini yaxşılaşdıracaq.
"Unibank" 2002-ci il oktyabrın 15-də iki özəl kommersiya bankı - "Mbank" və "Promtekhbank"ın birləşməsi nəticəsində yaranıb. "Unibank" universal maliyyə-kredit müəssisəsidir, pərakəndə və korporativ xidmətlər təklif edir. Avropa Yenidənqurma və İnkişaf Bankı (15,1515 faiz) və DEG alman investisiya korporasiyası (8,3333 faiz) kimi maliyyə institutları bankın səhmdarlarıdır.
