Azərbaycan, Bakı, 21 iyun /Trend, müxbir A.Axundov/
Azərbaycanda müşahidə edilən qeyri-sabit hava şəraiti müxtəlif bitki xəstəlikləri və zərərvericilərinin yaranmasına səbəb olur. Bununla əlaqədar Kənd Təsərrüfatı Nazirliyi fitosanitar nəzarət üzrə tədbirləri gücləndirir. Trend-in məlumatına görə, bu barədə çərşənbə axşamı jurnalistlərə nazirlik yanında Fitosanitar Nəzarət Xidmətinin rəhbəri Məmmədəli Dünyamalıyev deyib.
"Xidmət ölkənin bütün rayonlarında operativ qərargahlar yaradıb. İcra hakimiyyəti, bələdiyyə və digər aidiyyəti qurumların nümayəndələrinin iştirakı ilə mütəmadi müşahidələr aparılır", - Dünyamalıyev bildirib.
İyunun ortalarında Azərbaycanın regionlarında güclü yağışlar və dolu müşahidə edilib. Bu, ölkənin iqlimi üçün xarakterik deyil. Hava proqnozu da sevindirici deyil. Çərşənbə günü Azərbaycanda dolu, qısamüddətli yağışlar gözlənilir. Bəzi rayonlarda güclü yağışlar proqnozlaşdırılır, dolu düşəcəyi ehtimalı var.
"Bu yaxınlarda bizə məlumat daxil oldu ki, Masallı rayonunda pomidor və badımcan əkilmiş ərazilərdə yağışdan sonra xəstəliklər yaranıb. Həmin gün biz oraya operativ qrup göndərdik və fermerlərə hansı dərmanlardan istifadə ediləcəyini izah etdik", - Dünyamalıyev bildirib.
Onun sözlərinə görə, xidmət karantin obyektləri ilə mübarizə üzrə işi yalnız dövlət obyektlərində, Dövlət Fondunun ərazilərində aparır. Bu ərazilərdə olan karantin obyektlərinin 17 növü ilə mübarizə üçün Kənd Təsərrüfatı Nazirliyinə mütəmadi olaraq vəsaitlər ayrılır.
"Lakin bitkilərin minlərlə digər xəstəlikləri və ziyanvericiləri var. Hər bir fermer Avropadan keyfiyyətli preparatlar gətirən özəl kimya şirkətlərinə müraciət edə bilər", - Dünyamalıyev bildirib.
