Azərbaycan, Bakı, 24 iyun /Trend, müxbir N.İsmayılova/
Azərbaycanın Vergilər Nazirliyi Azərbaycan Prezidenti İlham Əliyevin "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" fərmanının icrası məqsədilə tədbirlər planını təsdiq edib. Trend-in məlumatına görə, bu barədə nazirliyin rəsmi saytında dərc olunmuş məlumatda bildirilir.
Plan 2011-2012-ci illərdə elektron ödənişlər sisteminin yaradılması və onun təkmilləşdirilməsi üzrə zəruri tədbirlərin görülməsini, vergi terminalları vasitəsilə göstərilən xidmətlərin, eləcə də elektron xidmətlər spektrinin genişləndirilməsi, 2011-ci ilin dekabrınadək yeni terminalların tikilməsi, 2011-2012-ci illərdə "elektron audit" sisteminin tətbiqi məqsədilə qanunvericiliyə dəyişikliklərin edilməsi haqqında təkliflərin hazırlanmasını nəzərdə tutur. Plan çərçivəsində elektron ticarətə vergi nəzarəti sahəsində beynəlxalq təcrübənin öyrənilməsi və 2011-2012-ci illərdə bu istiqamətdə təkliflərin hazırlanması da nəzərdə turulur.
Tədbirlər planı həmçinin elektron imzalar təqdim edən sertifikatlaşdırma mərkəzlərinə inteqrasiyanı nəzərdə tutur. Proses elektron imzaların tətbiqinə başlanandan iki ay sonra başlayacaq. 2011-ci ilin avqustunda elektron imzalardan istifadə olunmaqla vergi internet-idarəetmə əməliyyatlarının aparılması təmin olunacaq. 2011-ci ilin dekabrında nazirliyin internet portalı vasitəsilə onlayn-ödənişlərin həyata keçirilməsi üçün imkanların yaradılacağı gözlənilir, 2011-ci ilin sentyabrında internet vasitəsilə fiziki şəxslərin vergi orqanlarında uçota durması məqsədilə proqram təminatı hazırlanacaq.