Azərbaycan, Bakı, 28 iyun /Trend, müxbir A.Axundov/
Maliyyə Nazirliyi yanında Dövlət Sığorta Nəzarəti Xidməti hesab edir ki, 2012-ci ildə ölkənin sığorta bazarında sürətli artım olacaq.
"Gələn il biz sığorta bazarında həm könüllü, həm icbari, həm də non-life sığortanın kəskin artımının şahidi olacağıq", - Trend-ə Dövlət Sığorta Nəzarəti Xidmətinin rəhbəri Namiq Xəlilov deyib.
Onun sözlərinə görə, icbari sığortanın inkişafı könüllü növlərin inkişafına əlavə impuls verəcək və bunun nəticəsində belə artım olacaq.
"İcbari sığorata növlərində olduğu kimi sığortanın könüllü növlərində də dinamika var. Ortamüddətli və uzunmüddətli perspektivdə könüllü sığortanın payı artacaq. İcbari sığortanın fiziki həcmi artacaq, lakin onun ümumi portfeldə payı azalacaq", - Xəlilov bildirib.
Onun sözlərinə görə, bunu digər ölkələrin təcrübələri göstərir.
"Bazar inkişaf etdikcə, əhali arasında sığortanın yayılması ilə könüllü sığortanın rolu getdikcə daha da artır", - Xəlilov əlavə edib.
Dövlət Sığorta Nəzarəti Xidmətinin məlumatına görə, 2011-ci ilin yanvar-mayında sığortanın icbari növləri üzrə 26,933 milyon manat (il ərzində 94 faiz artım), könüllü növləri üzrə 59,519 milyon manat (12,3 faiz artım) məbləğində sığorta haqqı yığılıb. Bu gün bazarda icbari sığortanın payı 31,15 faiz təşkil edir, halbuki 2010-cu ilin sonunda o, 20 faiz səviyyəsində olub.
Artım bu il tətbiq edilməyə başlayan "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta" qanunla bağlıdır.
Bundan başqa, cümə günü Milli Məclis "İcbari sığortalar haqqında" qanun layihəsini qəbul edib.
Yeni qanun layihəsi icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
Xəlilovun sözlərinə görə, yeni qanunun əhatə etdiyi 4 icbari növ qalanlarından daha yaxşı işləyəcək.
"Onlar daha effektiv olacaq, çünki sığortanın bu növləri artıq özünü göstərən təcrübədən, onun müsbət və ya mənfi olmasından asılı olmayaraq, beynəlxalq praktikadan istifadə edilməklə hazırlanıb", - Xəlilov əlavə edib.
Onun sözlərinə görə, Azərbaycanın sığorta bazarının bu ilin ilk beş ayı ərzində göstərdiyi artım ilin yekunları üzrə 30 faizlik artımı proqozlaşdırmağa əsas verir.
İlk beş ay ərzində ölkədə fəaliyyət göstərən bütün şirkətlərin sığorta haqlarının ümumi həcmi 86,453 milyon manat (il ərzində 29,2 faiz artım) təşkil edib. Hesabat dövrü ərzində ödənişlər 22,195 milyon manat məbləğdə (19,9 faiz artımla) həyata keçirilib.
"Beş ayın yekunları üzrə ötən illə müqayisədə artımın 30 faizə yaxın olmasını, eləcə də söhbətin aydan-aya artımdan getdiyini nəzərə alsaq, çox güman ki, 30 faiz artım gözləmək mümkündür", - Xəlilov vurğulayıb.
Yanvarda Azərbaycan sığortaçılarının yığımlarının 5,18 faiz illik azalması qeydə alınıb, yanvar-fevralda sığorta bazarının illik artımı 8,1 faiz, birinci rübdə 9,9 faiz, yanvar-apreldə 23,47 faiz, yanvar-mayda 29,2 faiz illik artım olub.
İyunun 28-nə olan rəsmi məzənnə 0,7869 AZN/USD təşkil edir.