Azərbaycan, Bakı, 15 avqust /Trend, müxbir N.İsmayılova/
Avqustun 1-nə olan vəziyyətə görə, Azərbaycanda rəsmi olaraq 40,1 min nəfər işsiz kimi qeydiyyatdan keçib, işsizlərin 42,9 faizi qadındır. Bu barədə bazar ertəsi Dövlət Statistika Komitəsindən məlumat verilib. Ölkədə bir vakant iş yerinə üç işsiz iddialıdır.
Hesabat dövrü ərzində ölkənin əmək qabiliyyətli əhalisinin sayı 4 milyon 595,7 min nəfər təşkil edib. Bununla yanaşı, cari ilin yanvar-iyununda muzdla işləyənlərin sayı 1 milyon 370,2 min nəfər olub. Muzdla çalışanların ümumi sayından 854,2 mini dövlət sektorunda, 500,2 min nəfəri isə özəl sektorda çalışır.
İstehsalat sahəsində muzdla çalışanların 20,5 faizi sənaye, 2,6 faizi hasilat, 5,8 faizi emal sənayesi, 5,5 faizi tikintidə, 2,9 faizi kənd və meşə təsərrüfatı, balıqçılıq sahəsində çalışır.
Xidmət sahəsinə gəlincə, bu sahədə çalışanların 25,5 faizi təhsil, 19,8 faizi pərakəndə ticarət, avtomobillərin, məişət avadanlıqlarının təmiri, 10,1 faizi səhiyyə və sosial xidmətlər, 4,7 faizi nəqliyyat və anbar təsərrüfatı sahəsində, 1,8 faizi rabitədə, 0,7 faizi daşınmaz əmlakla bağlı əməliyyatlarda, 1,6 faizi maliyyə və sığorta fəaliyyətində və 1,1 faizi isə digər sahələrdə çalışır.
İşsizliyə görə müavinətin orta məbləği 190,7 manatdır.
Avqustun 15-nə olan rəsmi məzənnə 0,7866 AZN/USD təşkil edir.