Azərbaycan, Bakı, 13 sentyabr /Trend, müxbir A.Axundov/
Azərbaycan Sığortaçılar Assosiasiyası (ASA) ölkənin sığorta bazarının imkanlarının Almaniyanın Baden-Baden şəhərində keçiriləcək təkrar sığortaçılar və brokerlərin illik simpozium və forumunda təqdimatına hazırlıq səviyyəsini müzakirə edib.
"ASA-nın Müşahidə Şurasının bugünkü iclası zamanı Baden-Badendəki illik simpozium çərçivəsində keçirilməsi planlaşdırılan Azərbaycan sığorta işinin inkişafına həsr olunmuş tədbirə hazırlığın təşkili məsələləri müzakirə olunub", - ASA-nın icraçı direktor Azər Əliyev Trend-ə bildirib.
Sığorta həftəsi oktyabrın 23-28-də Baden-Badendə keçiriləcək, Azərbaycan sığorta bazarına həsr olunmuş tədbir də ayın 23-də başlanacaq.
Əliyev deyib ki, bu, təxminən 200 nəfərlik bütün iştirakçıların hər birinin iştirak etdiyi ilk gündür.
Onun sözlərinə görə, belə tədbirin əsas məqsədi Azərbaycan sığorta bazarının imkanlarının bütün dünyaya nümayiş etdirilməsidir.
"Bu gün Azərbaycanın sığorta bazarı sürətlə inkişaf etməyə başlayır və bazar xarici investorlar üçün maraq doğurur. Onlar Azərbaycana yalnız öz investisiyalarını deyil, həm də qazanılmış təcrübələrini gətirəcəklər", - Əliyev deyib.
Onun sözlərinə görə, tədbirin baş sporsorları ölkənin yeganə təkrar sığorta şirkəti AzRe və Beynəlxalq Sığorta Şirkətidir. Həmçinin, Standart Insurance və Atəşgah Həyat da sponsorlardır.
Hər il oktyabrın sonlarında Almaniyanın Baden-Baden şəhərində keçirilən təkrar sığortaçıların və brokerlərin simpoziumu və forumu beynəlxalq sığortanın cari istiqamətlərinin qiymətləndirilməsi və gələn il üçün təkrar sığorta fəaliyyətinin planlaşdırılması üzrə iri beynəlxalq tədbirlərdən biridir.
Əliyevin sözlərinə görə, iclasda sığorta üzrə ikinci milli olimpiadanın təşkili də müzakirə olunub.
"Azərbaycanın sığorta aləmində iki mühüm hadisə var: beynəlxalq sığorta forumu və sığortaçıların olimpiadası. Birincisi xarici bazara üz tutursa, ikincisinin hədəfi daxili bazardır", - o deyib.
Onun sözlərinə görə, olimpiada sentyabrın 30-da ASA və Maliyyə Nazirliyinin təşkilatçılığı ilə keçiriləcək. Birinci olimpiada ötən ilin sentyabrında baş tutub.
Azərbaycanda 27 sığorta və bir təkrar sığorta şirkəti var. Onların hamısı ASA-nın üzvüdür.