Azərbaycan, Bakı, 15 sentyabr /Trend, müxbir A.Axundov/
ABŞ-ın "Marsh" sığorta şirkətinin Azərbaycandakı nümayəndəliyi olan "Marsh sığorta və təkrar sığorta brokeri" MMC-nin aktivləri ötən il 2009-cu illə müqayisədə 11,5 dəfə artıb. Bu barədə şirkətin cümə axşamı rəsmi mətbuatda dərc olunmuş balans hesabatında deyilir.
Məlumata görə, 2010-ci ilin sonuna şirkətin ümumi aktivləri 7,6 milyon manat təşkil edib.
2010-ci ilin sonuna şirkətin uzunmüddətli aktivləri il ərzində 39,18 faiz artaraq 135 min manat, qısa müddətli aktivləri 13,22 faiz illik artımla 7,18 milyon manat təşkil edib.
2010-ci ilin yekunlarına görə, MMC-nin nizamnamə kapitalı 2009-cu ildəki kimi 10 min manat səviyyəsində olub. Şirkət 2010-cu ili 301 min manatlıq mənfəətlə başa vurub.
Ötən ilin sonuna şirkətin məcmu kapitalı 2009-cu illə müqayisədə 70,82 faiz artaraq 726 min manat olub. Şirkətin ümumi öhdəlikləri 28,96 dəfə artaraq 6,89 milyon manat təşkil edib.
"Marsh" şirkətinin Bakı ofisi 2002-ci ilin aprelində yaradılıb, fiziki şəxslərə, yerli və xarici şirkətlərə energetika, əmlak, hava və dəniz nəqliyyatı, səhiyyə və digər sahələr üzrə sığorta və təkrar sığorta xidmətləri göstərir.
Sentyabrın 15-nə olan rəsmi məzənnə 0,7867 AZN/USD təşkil edir.