Azərbaycan, Bakı, 22 sentyabr /Trend, müxbir N.İsmayılova/
Azərbaycanda investisiya fondlarının (İF) yaradılmasına maraq olsa da, hələlik konkret təkliflər təqdim olunmayıb. Trend-in məlumatına görə, bu barədə cümə axşamı jurnalistlərə Qiymətli Kağızlar üzrə Dövlət Komitəsinin (QKDK) sədri Rüfət Aslanlı bildirib.
"Məlum olduğu kimi, ötən ay qanunvericilik bazasının formalaşması başa çatdırıldı, həm Qərb və Şərq bazarlarının, həm də ölkə regionlarının şirkətləri Azərbaycan bazarına çıxmağa maraq göstərirlər. İndi onlar qanunvericilik bazasının və bazarın öyrənilməsi ilə məşğuldurlar ki, bu da bir qədər vaxt aparacaq", - Aslanlı deyib.
QKDK sədri bildirib ki, qanunvericilik bazasının formalaşmasının başa çatması və bu şirkətlərin daha da artmaqda olan marağı gələcəkdə konkret təkliflərin təqdim olunması mərhələsinə keçidi təmin edəcək.
Onun sözlərinə görə, bu gün ölkədə bazarın bu seqmenti yenicə formalaşır. Ölkə qanunvericiliyində müvafiq şirkətlər üçün müəyyən kapital tələbləri nəzərdə tutulub.
"Bu gün biznesin iri şirkətləri kapitallaşdırmağa nə dərəcədə hazır olması İF-in fəaliyyətinin ilk uğurlarından asılı olacaq. Güman edirəm ki, birinci mərhələdə aktivləri qiymətli kağızlarda müxtəlif indekslər və ya xammal məhsullarının qiymətləri bazasında yerləşdirilən müxtəlif İF-lər yaratmaq mümkün olacaq", - o deyib.
Aslanlınınsözlərinə görə, İF və kommersiya bankları müxtəlif mühitlərdə fəaliyyət göstərirlər ki, bu da onlar arasındakı rəqabəti minimuma endirir.
"Kommersiya banklarının xidmətlərindən, əsasən, kiçik və orta biznes və əhali, qiymətli kağzılar bazarının xidmətlərindən isə daha kapitallaşmış biznes yararlanır. Lakin bununla yanaşı, onlar arasında rəqabətin bir qədər payı saxlanılır", - o deyib.
Azərbaycan Parlamenti QKDK tərəfindən hazırlanan "İnvestisiya fondları haqqında" qanunu 2010-cu il oktyabrın 22-də qəbul edib. Bundan əvvəl fəaliyyət 1999-cu ildə qəbul edilən "İnvestisiya fondları haqqında" qanunla tənzimlənirdi.
Yeni qanunun hazırlanması 1999-cu ildə qəbul edilən "İnvestisiya fondları haqqında" qanunun müasir tələblərə cavab verməməsi ilə əlaqədar olub.
Belə qanunun qəbul edilməsi bazarda təklifləri genişləndirməyə imkan verir. Belə ki, investisiya fondları yeni alətlərin yaranmasını stimullaşdıracaq, əməliyyatların həcmi genişlənəcək və iştirakçılar üçün daha əlverişli şərait yaradılacaq.
Qanunun yeni redaksiyası investisiya fondlarının fəaliyyətində bir sıra yenilikləri nəzərdə tutur, həmçinin İF-lərin lisenziyalaşdırma prosedurunu dəqiq müəyyənləşdirir. Qanun layihəsinə əsasən, lisenziyalaşdırma iki mərhələdən ibarət olacaq. Birinci mərhələdə investisiya fondu yaratmaq istəyən şəxslər QKDK-ya fondun yaradılmasının məqsədəuyğunluğuna dair icazənin alınması üçün müraciət etməli olacaqlar. Bu müraciətin baxılma müddəti 60 gün təşkil edəcək.
İkinci mərhələdə artıq dövlət qeydiyyatından keçdikdən sonra yaradılan fond hüquqi şəxs kimi Dövlət Komitəsinə bilavasitə lisenziya üçün müraciət etməlidir. Lisenziya almaq üçün müraciətin baxılma müddəti 30 gün təşkil edir.
Azərbaycanda 1999-cu ildən investisiya fondları yaradılmır ki, bu da həmin sahədə qanunvericiliyin mükəmməl olmaması ilə əlaqədar idi.