Azərbaycan, Bakı, 27 sentyabr /Trend, müxbir İ.Xəlilova/
Almaniya İnkişaf Bankı - KfW Gəncə və Şəki şəhərlərində "Daşınmaz əmlakın kadastrı və qeydiyyatı" layihəsinin maliyyələşdirilmə prosesinin tezləşdirilməsində maraqlıdır.
"2,5 milyon avro məbləğində ayrılmış kredit vəsaitinin mənimsənilmə müddətinin 2013-cü ildə başa çatmasına görə bu prosesin tezləşdirilməsi yaxşı olardı", - bu barədə Trend-ə çərşənbə axşamı bankın Bakı ofisinin rəhbəri Natiq Abdullayev bildirib.
Onun sözlərinə görə, təcrübi layihənin həyata keçirilməsi qısa müddətdə başa çatıb və zəruri avadanlıqların alınması tamamlandığı üçün Gəncə və Şəki şəhərlərində sistematik ölçmə işlərinin aparılmasına ayrılmış vəsait kifayət edə bilər.
"Layihə Gəncənin şəhər ərazisi və Şəkinin kənd ərazisində daşınmaz əmlakın kadastr və qeydiyyat sisteminin inkişafı, daşınmaz əmlakın qeydiyyatı sahəsində xidmət keyfiyyətinin yüksəldilməsi, həmçinin bu sahədəki operativliyin artırılmasını nəzərdə tutur", - Abdullayev deyib.
Oktyabr ayının əvvəlində Əmlak Məsələləri Dövlət Komitəsi ilə birgə müştərək seminar keçirməyi planlaşdırır.
Almaniya bankı bu layihə üçün 450 min avro məbləğində qrant ayırıb.
Layihə iki mərhələdə həyata keçiriləcək. Birinci mərhələdə məsləhətçi xidmətləri göstəriləcək. Bu sahədə tenderin qalibi GFA/GCI Consortium şirkəti olub. Şirkət 2011-ci ilin yanvar ayında fəaliyyətə başlayıb və artıq iş planını Dövlət Komitəsinə təqdim edib.
Layihə çərçivəsində daşınmaz əmlakın qeydiyyat prosedurları təkmilləşdiriləcək, vaxta qənaət olunacaq, həmçinin qeydiyyat xərcləri aşağı salınacaq. Habelə, layihənin həyata keçirilməsi torpaq sahələrinin və daşınmaz əmlakın idarə olunması üçün əlverişli mexanizmin təşkil olunmasıma, rəqəmli kadarstr kartlarının hazırlanmasına şərait yaradacaq.