Azərbaycan, Bakı, 28 sentyabr /Trend, müxbir N.İsmayılova/
Sentyabrın 26-da Bakı Biznes Tədris Mərkəzində "Azərbaycanda biznesin idarə edilməsi sahəsində kadrların ixtisasının artırılması üzrə Almaniya-Azərbaycan ikitərəfli Proqramı" çərçivəsində sahibkarların və gənc menecerlərin Almaniyaya bir ay müddətinə ixtisasartırma kurslarına göndərilməsi məqsədilə müsabiqəyə başlanıb. Trend-in məlumatına görə, bu barədə çərşənbə günü İqtisadi İnkişaf Nazirliyinin yaydığı məlumatda deyilir.
Almaniyanın Beynəlxalq Əməkdaşlıq Cəmiyyətinin (GİZ) və Almaniyanın Menecment Akademiyasının nümayəndələri tərəfindən keçirilən müsabiqə 3 gün davam edəcək. Müsabiqədə iqtisadiyyatın müxtəlif sahələrində fəaliyyət göstərən 55 nəfər sahibkar və gənc menecer iştirak edəcək.
Müsabiqədə uğur qazanmış namizədlər 2011-ci ilin noyabrın 1-dən 30-dək Almaniyanın Menecment Akademiyasında və fəaliyyət göstərdikləri sahələrə uyğun müəssisələrdə tədris və təcrübə keçəcəklər.
Proqram çərçivəsində bütün zəruri xərclər (yol xərcləri istisna olmaqla) Almaniya tərəfindən ödəniləcək.