Azərbaycan, Bakı, 26 oktyabr /Trend/
23-26 noyabr tarixlərində "Bakı Ekspo" mərkəzində keçiriləcək illik Azərbaycan Beynəlxalq "Telekommunikasiya və informasiya texnologiyaları" ("BakuTel") sərgi və konfransı çərçivəsində ilk dəfə olaraq "Smart Zone" ("İntellektual ərazi") layihəsi start götürəcək. Trend-in məlumatına görə, bu barədə "Iteca Caspian" şirkətinin çərşənbə günü yaydığı məlumatda deyilir.
Layihənin əsas məqsədi gənc mütəxəssislərə İKT sahəsinə aid olan layihə və proqramlarını nümayiş etdirmək imkanını təmin etməkdir. Bazarda uzun müddət və uğurla fəaliyyət göstərən aparıcı telekommunikasiya şirkətləri ilə eyni sərgi meydançasında iştirak etməklə, möhtəşəm ideyaların gənc müəllifləri diqqəti öz yeni layihələrinə yönəltmək, onları həyata keçirmək və sürətlə inkişaf edən İKT sahəsində tətbiq etmək üçün unikal imkan əldə edəcəklər. "Iteca Caspian" və onun tərəfdaşı "ITE Group plc" şirkəti sərginin təşkilatçıları qismində çıxış edirlər. "Smart Zone" layihəsinin sponsoru isə "AzStarNet" şirkətidir.
"Smart Zone" layihəsində iştirak etmək istəyənlər 7 noyabr 2011-ci il tarixinə qədər sərginin vebsaytına (www.bakutel.az/smartzone) daxil olaraq anketi doldurmalıdırlar. Seçilmiş layihələrin/proqramların müəllifləri 7-14 noyabr tarixlərində müsahibəyə dəvət olunacaqlar.
Sərginin təşkilatçıları əmindirlər ki, "Smart Zone" layihəsi "BakuTel" sərgisinin xeyirxah ənənəsinə çevrilərək hər il yeni ideyaların aşkar edilməsi və istehsalda tətbiqi üçün imkan yaradacaq.