Azərbaycan, Bakı, 28 oktyabr /Trend, müxbir A.Axundov/
2012-2015-ci illərdə Azərbaycanda aqrar bankların yaradılması gözlənilir. Trend-in məlumatına görə, bu barədə baxılması üçün Azərbaycan Milli Məclisinə təqdim edilən "2012-ci il və növbəti üç il üzrə ölkənin sosial-iqtisadi inkişafı konsepsiyası" layihəsində deyilir.
"Kənd təsərrüfatı ilə məşğul olan sahibkarların maliyyə resursları üzrə tələbatını ödəmək üçün kənd yerlərində maliyyə-kredit institutlarının yaradılması (aqrar bankların yaradılması) və inkişafı gözlənilir", - layihədə deyilir.
Dövlət bank olmayan kredit təşkilatı (BOKT) "Aqrarkredit"in idarə heyətinin sədri Məmməd Musayevin daha əvvəl dediyinə görə, Azərbaycanda maliyyə resursları üzrə kənd təsərrüfatının tələbatı hazırda 1 milyard dolları manatı ötür.
"2011-ci ildə bank olmayan kredit təşkilatı "Aqrarkredit" bank olmaq yolundakı strategiyasını saxlamaqda davam edəcək. Bu gün Azərbaycan bazarında aqrar sektoru böyük kapital bazası ilə maliyyələşdirən iri bank strukturuna ehtiyac var. Bu maliyyə strukturu həm "Aqrarkredit", həm də digər təşkilat ola bilər. Lakin bu istiqamətdə addımlar mütləq atılacaq" , - Musayev deyib.
Onun sözlərinə görə, maliyyə resursları üzrə ölkənin aqrar sektorunun tələbatları qiymətləndirilən zaman kənd təsərrüfatında müxtəlif sahələrin fəaliyyətləri nəzərə alınıb. Bura onların həm mikrokreditlərdə, həm də iri layihələrdə tələbatları daxil edilib.
"Aqrarkredit"in idarə heyətinin üzvü Süleyman Kələşovun əvvəl dediyinə görə, ixtisaslaşmış aqrar bankın mövcudluğu ölkənin qeyri-neft sektorunun inkişafını stimullaşdırır.
"Hazırda kənd təsərrüfatının ölkənin ÜDM-də xüsusi çəkisi 5,2 faiz təşkil edir. Bu sahədə kreditlərin verilməsinin çoxalması onun ÜDM-dəki payını artıracaq", - Kələşov deyib.
Mərkəzi Bankın məlumatına əsasən, bank sektorunun ümumi kredit portfeli 9,2 milyard manat təşkil edir. Burada aqrar sektorun payına yalnız təxminən 500 milyon manat (5,4 faiz) düşür.
"Ölkədə ixtisaslaşmış bankın yaradılması, həmçinin ona görə lazımdır ki, kənd təsərrüfatı spesifik sahədir və kommersiya bankları bu sektorda ixtisaslaşmır. Burada kreditləşdirməyə xüsusi yanaşma lazımdır", - o deyib.
"Aqrarkredit"in əsas səhmdarı 99,9 faiz səhmə malik olan Azərbaycan Maliyyə Nazirliyidir. Qalan hissə isə bərabər olaraq "Azərsığorta" dövlət sığorta şirkəti ilə "Meliorasiya və Su Təsərrüfatı" ASC arasında bölüşdürülüb.
Oktyabrın 28-nə olan rəsmi məzənnə 0,7869 AZN/USD təşkil edir.