Azərbaycan, Bakı, 17 noyabr /Trend, müxbir A.Axundov/
2012-ci ildə dövlət büdcəsinin elm, təhsil, sosial təminat, mədəniyyət, səhiyyə, bədən tərbiyəsi, gənclik siyasəti və sosial tədbirlərə xərcləri 4,325 milyard manat təşkil edəcək ki, bu da 2011-ci ilin göstəricilərini 10,8 faiz və ya 421 milyon manat üstələyir.
Trend-in məlumatına görə, bu barədə cümə axşamı parlamentin Mədəniyyət, Elm və təhsil, Hüquq siyasəti və dövlət quruculuğu, Regional məsələlər, İnsan hüquqları, Beynəlxalq münasibətlər və parlamentlərarası əlaqələr komitələrinin "2012-ci ilin dövlət büdcəsi" layihəsinə həsr olunmuş birgə iclasında maliyyə naziri Samir Şərifov deyib.
"Xərclərin ümumi həcmində bu sahələrə ayrılan xərclərin payı 2012-ci ildə 25,5 faiz təşkil edəcək ki, bu da 2011-ci il göstəricisini bir faiz üstələyir", - Şərifov bildirib.
Nazir deyib ki, 2012-ci ildə bu sahələrdə layihələr və tədbirlərin həyata keçirilməsinə 666 milyon manat vəsait ayrılacaq.
Elm və təhsil komitəsinin sədri Şəmsəddin Hacıyevin sözlərinə görə, 2012-ci ilin büdcəsi optimaldır və əsaslandırılıb, eləcə də onun həyata keçirilməsi riskləri minimuma endirilib.
"Büdcə sosial və investisiya yönümlü olaraq qalacaq", - Hacıyev deyib.
Onun sözlərinə görə, 2012-ci il üçün ölkənin sosial-iqtisadi inkişafı konsepsiyası layihəsində yer alan ÜDM-in artım tempi inkişaf etmiş ölkələrdəki artım tempini iki dəfədən çox üstələyir.
"Dünya iqtisadiyyatının artım templəri 2,5-3,5 faiz təşkil edir. ÜDM-in adambaşına düşən artım tempi yüksək olaraq qalır, bu göstərici üzrə biz MDB-də qabaqcıl yerlərdən birini tuturuq. ÜDM-də qeyri-neft sektorunun payının artmasına baxmayaraq, büdcə gəlirlərinin aşağı səviyyəsi bu istiqamətdə addımlar atmağa məcbur edir", - Hacıyev deyib.
Onun sözlərinə görə, 2011 və 2012-ci illərdə ÜDM-in artım tempinin aşağı düşməsi neft hasilatı həcminin ildə 50 milyon ton səviyyəsində qalması ilə bağlıdır.
Noyabrın 17-nə olan rəsmi məzənnə 0,7865 AZN/USD təşkil edir.
