Azərbaycan, Bakı, 21 noyabr /Trend, müxbir N.İsmayılova/
Təsdiqlənmiş "İnvestisiya fondunun kapitalının formalaşdırılmasına, fondun aktivlərinin tərkibi, strukturu və idarə olunmasına tələblər haqqında" qaydalara görə səhmdar və paylı İF-nin nizamnamə kapitalı 500 min manat səviyyəsində müəyyən edilib. Bu barədə Trend-ə bazar ertəsi Azərbaycanın Qiymətli Kağızlar üzrə Dövlət Komitəsindən bildiriblər.
Aktivlərin idarə edilməsini həyata keçirən şəxs (bundan sonra - idarəçi) üçün nizamnamə kapitalının minimum məbləği 125000 (yüz iyirmi beş min) manat həcmində müəyyən edilib. İdarəçinin idarəetməsində olan aktivlərin həcmi 10000000 (on milyon) manatdan artıq olduqda, idarəçi həmin məbləğdən hər bir 200000 (iki yüz min) manata görə öz məcmu kapitalını artırılan məbləğin 0.625 faiz həcmində artırmalıdır. Məcmu kapitalın artırılan hissəsi 2000000 (iki milyon) manata çatdıqda məcmu kapitalın artırılması tələb olunmur.
İnvestisiya fondunun idarə edilməsi ilə bağlı xərcləri illik 5%-dən artıq ola bilməz.
İnvestisiya fondları, aktivlərinin tərkibinə əsasən, aşağıdakı qruplara bölünürlər: borc alətləri investisiya fondları, səhm investisiya fondları, qarışıq investisiya fondları, daşınmaz əmlak investisiya fondları, indeks investisiya fondları.
Səhm investisiya fondlarının aktivlərinin tərkibinə aşağıdakılar daxil ola bilər: pul vəsaitləri, bank depozitləri, səhmlər, səhm üzrə törəmə qiymətli kağızlar, açıq və interval paylı investisiya fondlarının payları.
Daşınmaz əmlak investisiya fondlarının aktivlərinin tərkibinə aşağıdakılar daxil ola bilər: bank depozitləri, dövlət qiymətli kağızları, bələdiyyə qiymətli kağızları, daşınmaz əmlak, daşınmaz əmlak üzrə törəmə qiymətli kağızlar.
İndeks investisiya fondlarının aktivlərinin tərkibinə aşağıdakılar daxil ola bilər: pul vəsaitləri, bank depozitləri, indeksın hesablama bazasına daxil olan qiymətli kağızlar.
"İnvestisiya fondları haqqında" qanun Azərbaycan Parlamenti tərəfindən 2010-cu il oktyabrın 22-də qəbul edilib. Bundan əvvəl həmin fəaliyyət 1999-cu ildə qəbul edilən analoji qanunla tənzimlənir.
Qanunun yeni redaksiyası investisiya fondlarının fəaliyyətində bir sıra yenilikləri nəzərdə tutur.
Qanunun yeni redaksiyası investisiya fondlarının lisenziyalaşdırma prosedurunu dəqiq müəyyənləşdirir. Qanun layihəsinə əsasən, lisenziyalaşdırma iki mərhələdən ibarət olacaq. Birinci mərhələdə investisiya fondu yaratmaq istəyən şəxslər QKDK-ya fondun yaradılmasının məqsədəuyğunluğuna dair icazənin alınması üçün müraciət etməli olacaqlar. Bu müraciətin baxılma müddəti 60 gün təşkil edəcək.
İkinci mərhələdə artıq dövlət qeydiyyatından keçdikdən sonra yaradılan fond hüquqi şəxs kimi Dövlət Komitəsinə bilavasitə lisenziya üçün müraciət etməlidir. Lisenziya almaq üçün müraciətin baxılma müddəti 30 gün təşkil edir.
Azərbaycanda 1999-cu ildən investisiya fondları yaradılmır ki, bu da bu sahədə qanunvericiliyin mükəmməl olmaması ilə əlaqədar idi.
Noyabrın 21-nə olan rəsmi məzənnə 0,7865 AZN/USD təşkil edir.