Azərbaycan, Bakı, 28 noyabr /Trend, müxbir A.Axundov/
Azərbaycan Ekologiya və Təbii Sərvətlər Nazirliyi ölkədə qızıl istehsalçısı olan "Anglo Asian Mining Plc" şirkətinə bu il "Qoşa" yatağının inkişafı və hasilatı üzrə icazə verilməsində maraqlıdır. Bu barədə bazar ertəsi Trend-ə ekologiya və təbii sərvətlər naziri Hüseynqulu Bağırov deyib.
Şirkət noyabrda ölkə hökumətinə "Qoşa" yatağının inkişafı və hasilatı proqramını təqdim edib.
"Şirkət kəşfiyyat işlərinin nəticələrini hökumətə təqdim edib. Onların müraciəti nəzərdən keçirilir. Biz özümüz maraqlıyıq ki, onlar bu icazəni tez bir müddətdə ala bilsinlər. Bu yataq hələ sovet dövründə aşkar edilib və biz onun istimara başlanmasında və dövlətə gəlirlər gəlməsində maraqlıyıq", - Bağırov bildirib.
"Anglo Asian Mining Plc" beş il ərzində ildə orta olaraq 10 mindən 15 min unsiya qızıl istehsal etmək məqsədilə "Qoşa" yatağını inkişaf etdirməyi planlaşdırır. Qızılın ilk partiyası 2013-cü ilin birinci yarısında gözlənilir.
Hasilatın pay bölgüsü haqqında sazişin şərtlərinə uyğun olaraq, Azərbaycan hökuməti 30 gün ərzində əlavə məlumat tələb edə bilər. Əgər hökumət sənədin əldə edilməsindən sonra 90 gün ərzində istehsal proqramının dəyişməsi və inkişafı üzrə tələbi yazılı şəkildə göndərməzsə, proqram qəbul edilmiş sayılacaq.
"Qoşa" yatağının inkişafı "Anglo Asian"ın Qafqaz və Mərkəzi Asiyada orta səviyyəli qabaqcıl qızıl itehsalçısına çevrilməsi yolunda daha bir vacib addım olacaq. "Qoşa" yatağının qızıl istehsalının həcminin artırılması üçün potensialı var", - şirkətin baş direktoru Rza Vəziri əvvəl deyib.
İlk qızıl və gümüş 2009-cu ilin mayında "Gədəbəy" yatağından hasil edilib. Şirkət yatağın bütün sahəsi üzrə məsafədən zondlama işləri apararaq orada bəzi potensial anomaliyalar aşkar edib və ərazinin gələcək tədqiqatını 2012-ci ilə planlaşdırıb.
"Anglo Asian Mining Plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü"də işləmək hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. 2011-ci ilin üç rübü ərzində "Gədəbəy" yatağından 41,770 unsiya qızıl hasil edilib.
Ümumilikdə, 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.
