Azərbaycan, Bakı, 24 dekabr / Trend müxbir A.Axundov /
Azərbaycan Sığortaçılar Assosiasiyası (ASA) 2012-ci ildə iki əsas istiqamət üzrə çalışacaq. Bu barədə şənbə günü Trend-ə ASA-nın icraçı direktoru Azər Əliyev məlumat verib.
"Gələn il planlar cari ildə olduğu kimi qalacaq. Bu, sığortanın təbliği və sığortaçıların təhsil səviyyəsinin yüksəldilməsi üzrə işdir", - Əliyev deyib.
Onun sözlərinə görə, sığorta forumunun və sığortaçılar üçün olimpiadanın keçiriləcəyi gözlənilir.
"Forumun və olimpiadanın keçirilməsi məcburi illik tədbirlər olmalıdır", - Əliyev deyib.
2011-ci ildə Bakıda Azərbaycan Sığortaçılar Assosiasiyasının təşkilatçılığı və Maliyyə Nazirliyinin dəstəyi ilə II Azərbaycan Beynəlxalq Sığorta Forumu və sığorta üzrə ikinci milli olimpiada keçiriləcək. Bununla yanaşı, təkrar sığortaçıların və brokerlərin illik simpoziumu və forumu çərçivəsində Almaniyanın Baden-Baden şəhərində ölkənin sığorta bazarının imkanlarının təqdimatı keçirilib.
Əliyevin sözlərinə görə, ASA təsisçilərinin bu həftə keçirilən ümumi toplantısında sığorta forumu, sığorta olimpiadası, jurnalın buraxılması və s. kimi tədbirlərin əsas xərclərinin assosiasiyanın büdcəsinə daxil edilməsi barədə qərar qəbul edilib.
"Beləliklə də, assosiasiyanın büdcəsi bir qədər artıb və müvafiq olaraq assosiasiyaya üzvlük haqları da çoxalıb. Bütün bu qərarlar praktiki olaraq yekdilliklə qəbul edilib. Yanvarın sonunda yeni büdcə təsdiqlənmək üçün sığortaçılara verilib", - Əliyev deyib.
Onun sözlərinə görə, üzvlük haqlarının məbləği Müşahidə Şurasına üzvlükdən, şirkətin bazardakı payından və digər amillərdən asılıdır. Hazrda üzvlük haqqının məbləği beş min manat təşkil edir.
Azərbaycandakı 28 sığorta və bir təkrar sığorta şirkəti ASA-nın üzvləridir. Sığorta şirkətlərindən Fidan Sığorta və Günay Sığortanın fəaliyyəti müvafiq olaraq avqustda və noyabrda yarım il müddətinə dayandırılıb. Ona görə də həmin şirkətlər yeni müqavilələr bağlamaq hüququna malik deyillər və yalnız qüvvədə olan müqavilələr üzrə xidmət göstərə bilərlər.
Dekabrın 24-nə rəsmi məzənnə 0,7863 AZN/USD təşkil edir.
