Azərbaycan, Bakı, 5 yanvar /Trend, müxbir A.Axundov/
Azərbaycanın sığorta bazarının yeni oyunçusu olan "Royal Sığorta" şirkəti təkrar sığorta üzrə riskləri qəbul etməyə hazırdır. Bu barədə cümə axşamı Trend-ə şirkətin idarə heyətinin sədri Nüsrət Babayev deyib.
"Bizim kapitalımız 5,5 milyon manat səviyyəsindədir və bu göstərici üzrə hazırda ölkədə fəaliyyət göstərən şirkətləri üstələyirik. Kapitalımız təkrar sığorta üzrə riskləri qəbul etməyə imkan verir", - o bildirib.
Onun sözlərinə görə, bu il, həmçinin, şirkətin kapitalının artırılması planlaşdırılır.
"Biz həm yerli təkrar sığorta şirkətləri - AzRe, həm Dövlət Kommersiya Sığorta Şirkəti, həm də Rusiya, Türkiyə və Niderlanddan olan xarici şirkətlərlə işləyəcəyik", - Babayev qeyd edib.
"Royal Sığorta" şirkətinə 2011-ci il dekabrın 28-də Maliyyə Nazirliyi yanında Dövlət Sığorta Nəzarəti Xidməti tərəfindən sığorta fəaliyyəti göstərmək üçün beşillik lisenziya verilib.
Şirkət dövlət qeydiyyatından 2011-ci ilin oktyabrın 11-də keçib.
Beş fiziki şəxs sığorta şirkətinin təsisçisi qismində çıxış edir.
Yanvarın 5-nə olan rəsmi məzənnə 0,7865 AZN/USD təşkil edir.
