Azərbaycan, Bakı, 25 yanvar /Trend, müxbir A.Axundov/
2011-ci ilin dekabrında Bakının ilkin mənzil bazarında qiymətlər əvvəlki ayla müqayisədə 0,3 faiz enərək bir kvadratmetrə görə 825,2 manat səviyyəsinə çatıb. Bu barədə çərşənbə günü Trend-ə "Əmlak Bazarı İştirakçıları" İctimai Birliyindən məlumat veriblər.
"İlin əvvəlinə və ötən ilin analoji dövrünə olan vəziyyətə görə qiymətlər 2,7 faiz azalıb. Böhran dövrü ilə (2008-ci ilin sentyabrı) ilə müqayisədə qiymətlər 30,9 faiz aşağı düşüb", - təşkilatın məlumatında deyilir.
Qiymət indeksi dekabrda bir bənd enərək 316,1 bəndə çatıb.
Dekabrda Bakıda tikilən, lakin hələ də satılmayan, eləcə də yeni tikililərin sayı əvvəlki ayda olduğu kimi 424, tikinti şirkətlərinin sayı isə bir ədəd azalmaqla 151 ədəd təşkil edib.
Əvvəlki aylarda olduğu kimi, dekabrda da yeni tikililərdə mənzillərin əksəriyyəti üçotaqlı olub. Yeni tikilidə birotaqlı mənzilin sahəsi orta hesabla 60,7 kvadratmetr, ikiotaqlının 92,1 kvadratmetr, üçotaqlının 131,8 kvadratmetr, dördotaqlının 182,9 kvadratmetr, beşotaqlının isə 238,3 kvadratmetr təşkil edib.
