Gürcüstan, Tbilisi, 16 fevral /Trend, müxbir N.Kirsxaliya/
Azərbaycan son beş ildə Gürcüstana 800 milyon dollar investisiya qoyub. Trend-in məlumatına görə, bu barədə cümə axşamı Tbilisidə Azərbaycan-Gürcüstan-Türkiyə biznes forumunun yekunları üzrə keçirilən brifinqdə Azərbaycanın iqtisadi inkişaf naziri Şahin Mustafayev bildirib.
"Azərbaycanlı biznesmenlər bu müddət ərzində Gürcüstanda 272 şirkət təsis ediblər. Öz növbəsində, bu şirkətlər ümumilikdə 7 mindən çox iş yeri yaradıblar", - nazir qeyd edib.
Mustafayev qeyd edib ki, Azərbaycan regional əməkdaşlığa böyük diqqət yetirir.
"Biz qaz və neft kəmərlərinin, dəmir yollarının tikintisi üzrə bir sıra birgə iri lahiyələr həyata keçiririk ki, bu da regionun iqtisadi inkişafı və səmərəli əməkdaşlığımız üçün çox yaxşı imkanlar yaradır, xalqlarımızın həyat səviyyəsinin yaxşılaşmasına kömək edir", - nazir vurğulayıb.
Mustafayev bu gün Tbilisidə keçirilmiş Azərbaycan-Gürcüstan-Türkiyə biznes forumundan məmnun qaldığını ifadə edib. O qeyd edib ki, bu, regionda iqtisadi əməkdaşlığın genişlənməsi yolunda daha bir addım olacaq.
Biznes forumda Azərbaycan, Türkiyə və Gürcüstandan 100-dən artıq biznesmen iştirak edir.
