Azərbaycan, Bakı, 2 mart /Trend müxbir A.Axundov/
Fevralda avtonəqliyyat vasitələri sahiblərinin mülki məsuliyyətinin icbari sığortası üzrə İcbari Sığorta Bürosunun informasiya sistemi vasitəsilə 39 875 saziş bağlanıb. Bu barədə cümə günü Trend-ə bürodan bildiriblər.
Bu sazişlərdən 12968-i tranzit məqsədlərlə xaricdə qeydiyyata alınan və Azərbaycana gətirilən avtomobillərə aid olub və bir aylığa imzalanıb.
"Avtonəqliyyat vasitələri sahiblərinin mülki məsuliyyətinin icbari sığortası üzrə sazişlər üzrə sığorta mükafatlarının həcmi fevralda 3,17 milyon manat təşkil edib", - bürodan qeyd ediblər.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına əsasən, 2011-ci ilin əvvəlindən oktyabrın ortalarınadək, yəni köhnə qanunun qüvvədən düşməsinə qədər bu növ üzrə 4,343 milyon manat yığılıb. Polislərin verilməsi artıq yeni şərtlər üzrə "İcbari sığortalar haqqında" qanunun qüvvəyə minməsindən sonra dekabrın 16-da bərpa edilib və ilin sonunadək avtonəqliyyat vasitələri sahiblərinin mülki məsuliyyətinin icbari sığortası üzrə daha 98,32 min manat toplanıb.
2012-ci ilin yanvar-fevral aylarında bu növ üzrə yığımlar 5,2 milyon manat təşkil edib ki, bu da 2011-ci ilin analoji göstəricisini 8,47 dəfə və bütün ötən ilin göstəricilərini 19,73 faiz üstələyir.
Azərbaycanda avtonəqliyyat vasitələri sahiblərinin mülki məsuliyyətinin icbari sığortası üzrə mükafatların belə artımı bu növ üzrə mükafatların məbləğinin xeyli artması ilə bağlıdır.