Azərbaycan, Bakı, 5 mart /Trend, müxbir E.İsmayılov/
Dünya Bankı (DB) 2013-2014-cü illər üçün Azərbaycanla əməkdaşlıq proqramı çərçivəsində martın 5-6-da Bakıda keçiriləcək II yüksək səviyyəli iqtisadi siyasət forumu zamanı qəbul ediləcək tövsiyələrdən istifadə etməyi planlaşdırır.
Trend-in məlumatına görə, DB-nin yüksək səviyyəli iqtisadi forumu keçirməkdə əsas məqsədi Azərbaycanın qeyri-neft sektorunun daha çox yer alacağı gələcək iqtisadi siyasətin əsas tərkib hissələrinin ətraflı müzakirəsi üçün platforma təmin etməkdir.
Forumda qeyd edilib ki, Azərbaycan son illər yüksək və dinamik artıma nail olub. 2003-cü ildən bəri ölkənin iqtisadiyyatı üç dəfə artıb və yoxsulluq beş dəfədən çox azalaraq təkrəqəmli səviyyəyə enib.
Ölkənin yüksək gəlirli ölkələr sırasına daxil olmasına kömək etmək üçün Azərbaycan karbohidrogen ehtiyatlarından kənar inkişaf strategiyası və artım drayverləri axtarışındadır. Yeni inkişaf modeli Azərbaycan iqtisadiyyatının daha geniş diversifikasiyasına əsaslanacaq, innovasiyalar, investisiya və ixrac təqdir ediləcək, dövlət institutunun səmərəliliyi daha da yüksəldiləcək, insan kapitalı inkişaf etdiriləcək və məşğuliyyətin əhəmiyyətli hissəsinin cəmləşdiyi kənd təsərrüfatı sektorunda əlavə artım imkanları yaradılacaq.
Forum zamanı Çilinin sabiq prezidenti Rikardo Laqos, Peru Azadlıq və Demokratiya İnstitutunun prezidenti Hernando de Soto, Avstraliya, Adelaida Universitetinin professoru Kim Anderson, UNESCO-nun Asiya və Sakit Okeanı ölkələri üzrə regional direktoru, Koreyanın keçmiş təhsil naziri Qvanq-Co Kim, "Altura Advisers" təşkilatının icraçı tərəfdaşı Simon Kommander, Rusiyanın "Obşestvennıy doqovor" Milli Layihə İnstitutunun prezidenti, professor Aleksandr Auzan öz təcrübələrini iştirakçılarla paylaşacaqlar.
