Azərbaycan, Bakı, 6 mart /Trend, müxbir Ə.Həsənov/
National Bank of Pakistan-ın ("NBP Bank") Bakı filialı 2012-ci ilin ortalarına qədər lokal plastik kartların buraxılışına başlamağı planlaşdırır. Bu barədə çərşənbə axşamı Trend-ə bankın baş menecerinin müavini Sahib Quliyev bildirib.
"Biz ilkin mərhələdə lokal kartlar buraxmağı planlaşdırırıq, lakin gələcəkdə beynəlxalq plastik kartlarının da buraxılışı təmin ediləcək", - Quliyev deyib.
"NBP Bank"ın kartlarına "Milli Kart" prosessinq mərkəzi tərəfindən xidmət göstəriləcək. İlkin mərhələdə 250-300 kart buraxılacağını qeyd edən Quliyev quraşdırılması planlaşdırılan bankomatların və POS-terminalların sayını dəqiqləşdirməkdə çətinlik çəkib.
2006-cı ilin iyulun 14-də təsis edilən "Milli Kart" hazırda Azərbaycanın 12 bankının kartlarına xidmət göstərir.
"NBP Bank"ın Bakı filialı Azərbaycanda 2005-ci ilin iyulundan fəaliyyət göstərir. 2011-ci ilin yekunları üzrə filialın aktivləri 11 milyon manat, kredit portfeli 4,3 milyon manat, depozit portfeli 0,9 min manat təşkil edib. Bankın nizamnamə kapitalı 10 milyon manatı ötür, məcmu kapital isə 10,3 milyon manatdır.
National Bank of Pakistan 1949-cu ildə təsis edilib. Bank Pakistan hökumətinin 75 faizlik iştirak payı ilə yaradılıb. Hazırda "NBP Bank"ın 39 xarici filialı var. Bankın Cənubi Qafqazda yalnız Bakıda nümayəndiliyi var.