Azərbaycan, Bakı, 19 mart /Trend, müxbir Ə.Həsənov/
2012-ci ilin yanvar-fevral aylarında Azərbaycanda tikinti işlərinin həcmi ötən ilin analoji dövrü ilə müqayisədə 61,7 faiz artıb. Trend-in məlumatına görə, bu barədə bazar ertəsi Dövlət Statistika Komitəsinin hesabatında deyilir.
O cümlədən, dövlət şirkətlərinin həyata keçirdiyi tikinti işlərinin həcmi ümumi tikinti işlərinin 28,5 faizini təşkil edib. Özəl şirkətlərin payına isə 71,5 faiz düşüb.
Tikinti işlərinin ümumi həcmindən 79,4 faiz ilkin tikinti, yenidənqurma və genişlənmə, 11,4 faiz əsaslı təmir, 2,1 faiz cari təmir, 7,1 faiz isə digər tikinti işlərinin payına düşüb.
2012-ci ilin yanvar-fevral aylarında Azərbaycanda mənzilin istismara verilmə həcmi ötən ilin analoji dövrü ilə müqayisədə 49,4 faiz artıb.
Azərbaycan Dövlət Statistika Komitəsinin məlumatına əsasən, yanvar-fevral aylarında 247,1 min kvadratmetr mənzil istifadəyə verilib. 2011-ci ilin analoji dövründə bu göstərici 165,4 min kvadratmetr olub.
