Azərbaycan, Bakı, 19 mart /Trend/
Qara Dəniz və Xəzər Dənizi Sahibkarlar Konfederasiyaları Birliyinin (UBCCE) ümumi toplantısı Səda Çatalkayanı üç il müddətinə baş katib vəzifəsinə təyin edib. Trend-in məlumatına görə, bu barədə bazar ertəsi Azərbaycan-Türkiyə İş Adamları Birliyinin (ATİB) yaydığı məlumatda deyilir.
Yeni baş katib UBCCE-də beş ilə yaxındır işləyir.
"Yeni baş katibin təyinatı Birliyin yaranmasından etibarən orada işləyən Murad Zonqurun digər işə keçməsi ilə əlaqədardır", - məlumatda deyilir.
UBCCE-nin ümumi toplantısı martın 13-də İstanbulda baş tutub. Toplantıda ATİB-in Baş Katibliyindən Rəşad Rəsullu çıxış edib.
Ümumi toplantıda fəaliyyət planı və 2012-ci il üçün büdcə təsdiqlənib. Toplantıda Polşa Özəl İşəgötürənlər Konfederasiyasının üzvlüyü haqqında müraciətə baxılıb və o, müşahidəçi qismində UBCCE-yə qəbul edilib.
UBCCE 2006-cı il noyabrın 27-də yaradılıb. Təşkilatın baş ofisi İstanbulda yerləşir.