Azərbaycan, Bakı, 28 mart /Trend, müxbir A.Axundov/
2012-ci il fevralın 1-nə olan məlumata əsasən, Azərbaycanda 4,621 milyon ədəd ödəniş kartı var. Bu da yanvar ərzində 0,9 faiz, 2011-cu ilin analoji dövrünün göstəricisi ilə müqayisədə 8,65 faiz artım deməkdir. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) statistik hesabatında deyilir.
Yanvarda bankomat və POS-terminallar vasitəsilə ödəniş kartları üzrə ümumi dövriyyə 531 milyon manat, əməliyyatların ümumi sayı isə 3,541 milyon ədəd təşkil edib.
Debet kartlar üzrə əməliyyatların ümumi sayı 3,269 ədəd, həcmi isə 455 milyon manat təşkil edib.
Debet kartlar üzrə əməliyyatların ümumi sayından bankomatlar vasitəsilə 423 milyon manat məbləğində 2,941 min, POS-terminallar vasitəsilə 16 milyon manat məbləğində 185 min əməliyyat yerinə yetirilib.
2012-ci ilin yanvarında kredit kartları vasitəsilə ümumi həcmi 76 milyon manat olan 272 min əməliyyat həyata keçirilib.
Kredit kartları vasitəsilə əməliyyatların ümumi sayından 26 milyon manatlıq 86 min əməliyyat bankomatlar, 16 milyon manatlıq 45 min əməliyyat isə POS-terminallar vasitəsilə həyata keçirilib.
2012-ci il fevralın 1-nə olan məlumata əsasən, ölkədə 2148 bankomat fəaliyyət göstərib, onlardan 1187 ədədi Bakıda, 961 ədədi isə ölkənin digər şəhər və rayonlarında yerləşir. Onların ümumi sayı il ərzində 241 ədəd və ya 12,64 faiz artıb.
2012-ci il fevralın 1-nə olan məlumata görə, POS-terminalların sayı 13 686 ədəd təşkil edib ki, onlardan 12 604 ədədi Bakıda, 1082 ədədi isə digər şəhər və rayonlarda yerləşir. Onların sayı 2011-ci ilin yanvarı ilə müqayisədə 5124 ədəd və ya 78,9 faiz artıb.
