Azərbaycan, Bakı, 9 aprel /Trend, müxbir Ə.Həsənov/
Son 5-6 il ərzində Azərbaycan daşınmaz əmlak bazarının iştirakçıları xeyli güclənib və xarici şirkətləri sıxışdırmağa başlayıb. Bu barədə bazar ertəsi Trend-ə "MBA LTD" konsaltinq şirkətinin baş direktoru Nüsrət İbrahimov bildirib.
"Əvvəllər xarici şirkətlər respublikada aparıcı qüvvə olub. Çünki yerli şirkətlərin maliyyə və texniki imkanları çatışmırdı", - İbrahimov deyib.
Onun sözlərinə görə, hazırda bazar iştirakçılarının formalaşdırılması prosesi davam edir. "Kredit təşkilatları öz siyasətini bazarın tələblərinə uyğun qurmağa çalışır. Lakin tikinti və sığorta şirkətləri hələ də bu planda çətinlik çəkir", - İbrahimov vurğulayıb.
"İlkin hesablamalara əsasən, tikinti sektorunda orta illik investisiyalar 3 milyard manat təşkil edir. Adambaşına düşən məbləğ və həcm üzrə bu göstərici günün tələblərinə cavab verir. Buna görə də keyfiyyətcə yeni mərhələyə keçməyin vaxtıdır", - ekspert hesab edir.
O bildirib ki, digər tərəfdən, Azərbaycan bazarının məhdudluğu ilə əlaqədar ölkəyə daxil olan əlavə pul axınları və işçi qüvvəsi dərhal bazar indikatorlarına təsir edir. İndikatorlar isə hələlik loyallıqları ilə fərqlənirlər.
Onun fikrincə, bu gün Bakının daşınmaz əmlak bazarında aktivlik tendensiyası müşahidə edilir.
"2009-2010-cu illərlə müqayisədə 2011-ci ildə və 2012-ci ilin ötən dövrü ərzində mənzil bazarında aktivlik 25 faiz artıb", - İbrahimov qeyd edib.
