Azərbaycan, Bakı, 21 sentyabr /Trend, müxbir A.Axundov/
1995-2011-ci illərdə Azərbaycan iqtisadiyyatına qoyulan investisiyaların təxminən 60 faizi qeyri-neft sektorunun payına düşür. Bu barədə cümə günü Trend-ə İqtisadi İnkişaf Nazirliyindən məlumat verilib.
"1995-2011-ci illərdə Azərbaycan iqtisadiyyatına 118,6 milyard dollar sərmayə qoyulub ki, bunun 48,5 milyardı neft, 70,1 milyardı isə qeyri-neft sektoruna qoyulub", - nazirlikdən deyilib.
Hesabat dövründə daxili investisiyalar 55,5 milyard dollar, xarici investisiyalar 63,1 milyard dollar təşkil edib. Xarici investisiyaların strukturunda birbaşa investisiyaların payına 65,6 faiz, yaxud 41,4 milyon dollar düşür.
Məlumata görə, 2011-ci ildə ümumi investisiyalar 21,6 milyard dollar təşkil edib.
"Ötən il xarici investisiyalar 8,6 milyard dollar, o cümlədən birbaşa xarici investisiyalar 4,4 milyard dollar, daxili investisiyalar 13 milyard dollar təşkil edib. Hesabat dövründə neft sektoruna altı milyard dollar, qeyri-neft sektoruna 15,6 milyard dollar investisiya qoyulub", - nazirlikdən bildirilib.
Nazirlikdən o da qeyd edilib ki, bu gün Azərbaycan iqtisadiyyatına ümumi kapital qoyuluşları 130 milyard dolları ötür.