Azərbaycan, Bakı, 16 oktyabr /Trend/
Azərbaycan Sənaye Bankının "Eurovision 2012" mahnı müsabiqəsi ərəfəsində Azərbaycan Mədəniyyət və Turizm Nazirliyi, Mastercard və Milli Kart Prosessinq Mərkəzi ilə işbirliyi nəticəsində bazara çıxardığı "Baku Card" hazır (prepaid) səyahət kartı artıq yeni - şəhər kartı konsepsiyası ilə yenidən istehlakçılarla görüşəcək.
Bankdan Trend-ə verilən məlumata görə, belə ki, bununla bağlı ilk təqdimat "SKAL" Beynəlxalq Turizm Peşəkarları Assosiyasının 11-ci toplantısında turizm ictimaiyyətinə təqdim olunub. Toplantıda turizm agentliklərinin nümayəndələri, sahibkarlar, Mədəniyyət və Turizm Nazirliyinin əməkdaşları iştirak ebiblər.
Təqdimatda çıxış edən ASB Bankın idarə heyətinin üzvü Cenk Bartın "Baku Card"la bağlı hesabat xarakterli geniş məlumat verib. Bununla yanaşı, səyahət paketinin hazırkı vəziyyətdə mövqeyinin gücləndirilməsi üçün görüləcək işlər haqqında da müzakirələr aparılıb.
Beynəlxalq ödəniş vasitəsi olan, Maestro loqolu "Baku Card"ın Azərbaycan Mədəniyyət və Turizm Nazirliyinin dəstəyi ilə Bakının bütün turizm obyektlərində - muzeylər, mədəniyyət mərkəzləri, teatrlar, nəqliyyat vasitələri, milli parklarda, həmçinin alış veriş mərkəzləri, hotel, restoran, kafelərdə endirimlər tətbiq etməsi planlaşdırılır. Hazırda isə "Baku Card" vasitəsilə 100-dən çox alış-veriş və xidmət məntəqəsində endirimlər tətbiq edilməkdədir.
"Baku Card"ı həm fərdi, həm də qruplar üçün toplu şəkildə turizm məlumat mərkəzlərindən, turizm agentliklərindən və hotellərdən almaq mümkün olacaq.
Qeyd edək ki, "Azərbaycan Sənaye Bankı" 1996-cı ildən fəaliyyətə başlayıb. 2012-ci ilin oktyabr ayının 1-nə bankın aktivlərinin həcmi 159.854 mln. manat, depozit portfeli 86.262 mln. manat, kredit portfeli 121.001 mln. manat, nizamnamə kapitalı 28.000 mln. manat təşkil edir. Bankın respublika üzrə 9 filialı, 2 şöbəsi, 36 bankomatı və 613 POS-terminalı mövcuddur.