Azərbaycan, Bakı, 21 noyabr /Trend, müxbir C.Nəsibova/
Rusiyanın "Soqlasiye" sığorta şirkəti Azərbaycanda əməliyyatlar çərçivəsində 2013-cü ilin ilk yarısında təxminən 350 min dollar məbləğdə müqavilə bağlamağı planlaşdırır. Trend-in məlumatına görə, bu barədə çərşənbə günü şirkətin Azərbaycandakı nümayəndəliyinin rəhbəri Emin Aslanov mətbuat konfransında deyib.
Onun sözlərinə görə, şirkət artıq Azərbaycanda il yarımdır işləyir, Bakıda şirkətin nümayəndəliyi isə iki ay əvvəl açılıb.
"Soqlasiye" SŞ nümayəndəliyinin qarşısında şirkətin risklərinin təkrar sığortası çərçivəsində Azərbaycanın sığorta şirkətləri ilə əməkdaşlıq əlaqələrinin qaydaya salınması üzrə məsələlər dayanır. Nümayəndəlik Azərbaycanın vergi orqanlarında iyunun 19-da dövlət qeydiyyatından keçib.
"Biz işlədiyimiz bütün növlər üzrə riskləri qəbul etmək niyyətindəyik. Tikinti-montaj işlərinin sığortası, dəniz sığortası, yüklərin sığortası, məsuliyyət sığortasının müxtəlif növləri və s. çox maraqlıdır. Rusiyada olduğu kimi, Azərbaycanda da hava gəmilərinin sayı fəal surətdə artır ki, bu baxımdan da aviasiya sığortası maraqlıdır", - bundan əvvəl şirkətin direktoru Elnur Suleymanov bildirib.
