Azərbaycan, Bakı, 23 noyabr /Trend, müxbir A.Axundov/
Azərbaycanda fərdi sahibkarlar və torpaq sahələrinin sahibləri Dövlət Sosial Müdafiə Fonduna (DSMF) hesabat təqdim etməkdən azad ediləcəklər. Trend-in məlumatına görə, bu barədə cümə günü jurnalistlərə Fondun sədri Səlim Müslümov bildirib.
"Biz sosial sığorta haqqında qanuna dəyişiklik etməyə hazırlaşırıq. Bu dəyişikiliyə əsasən, fiziki şəxs qismində qeydiyyata alınan, sahibkarlıq fəaliyyəti ilə məşğul olan sığortaçılar və torpaq sahələrinin sahibləri daha hesabat təqdim etməyəcəklər. Belə ki, onların ödənişləri qanunla müəyyən edilmiş stasionar rəqəmdir. Məsələn, ticarət sahəsində fərdi sahibkar ölkədə minimum əməkhaqqının 70 faizə qədərini ödəməlidir və hər hansı hesabatlılığa ehtiyac yoxdur", - Müslümov qeyd edib.
Onun sözlərinə görə, sahibkarlıq fəaliyyəti ilə məşğul olan və bir neçə işçisi olan fiziki şəxslər istisna təşkil edirlər. Belə ki, onlar işçiləri ilə əlaqədar olaraq icbari sosial sığorta üzrə ödənişlər etməlidirlər. DSMF artıq Nazirlər Kabinetinə təkliflər göndərib və orada bunu digər dövlət strukturları ilə razılaşdırırlar.
"Çağırışlarımıza baxmayaraq, elektron formada hesabatların təqdimatı ləng gedir. 9 ayın nəticəsinə əsasən, 13 mindən çox sığortaçı hesabatları elektron formada təqdim edib. Bu, çox cüzi rəqəmdir və bizi qane etmir", - Müslümov vurğulayıb.
Onun sözlərinə görə, DSMF şöbələri artıq ölkənin 36 rayonunda KÖMİS sisteminə (Kütləvi Ödənişlər üzrə Mərkəzləşdirilmiş İnformasiya Sistemi) qoşulublar.
"Üçüncü rübün yekunları üzrə bu yolla Fonda 32 milyon manat daxil olub. Templər çox yaxşıdır və elektron ödənişlər artacaq", - Müslümov deyib.