Azərbaycan, Bakı, 4 dekabr /Trend, müxbir A.Axundov/
Azərbaycanda həyat sığortası ilə məşğul olan "Paşa Həyat", "Atəşgah Həyat" və "Qala Həyat" şirkətləri 2012-ci ilin yanvar-oktyabr aylarında həyat sığortasının bütün növləri üzrə 32,79 milyon manat toplayıblar ki, bu da ötən ilin analoji dövr göstəricisini 60,81 faiz üstələyir.
Trend-in məlumatına görə, bu barədə Maliyyə Nazirliyinin 2012-ci ilin yanvar-oktyabr aylarında sığorta şirkətlərinin fəaliyyəti haqqında hesabatında deyilir.
Bununla yanaşı, şirkətlərin yığımlarının ümumi həcmində həyat sığortası üzrə mükafatların payı il ərzində 11,38 faizdən 11,62 faizədək artıb.
Bu növlər üzrə ödənişlər də artıb: 2012-ci ilin yanvar-oktyabr aylarında 3,94 milyon manat dəyərində dəymiş ziyan ödənilib ki, bu da ötən ilin yanvar-oktyabr aylarındakı göstəricidən 10,84 dəfə çoxdur.
2012-ci ilin ilk 10 ayı ərzində şirkətlər istehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta üzrə 20,46 milyon manat toplayıblar. Bu, ötən ilin analoji dövr göstəricisindən 16,85 faiz çoxdur.
Könüllü həyat sığortası üzrə yığımlar il ərzində 4,28 dəfə artaraq 12,33 milyon manata çatıb. Həyat sığortası sahəsində yığımların böyük hissəsi (9,82 milyon manat) ömrün qalan hissəsinin sığortasının payına düşüb. Qalan hissə ölum halının sığortalanması (2,43 milyon manat) və sağalmaz xəstəliklərdən sığortalanma (85,77 min manat) hesabına təmin edilib.
Yanvar-oktyabr aylarında könüllü həyat sığortası üzrə 2,89 milyon manat, icbari həyat sığortası üzrə 1,05 milyon manat məbləğində ödənişlər həyata keçirilib.
2012-ci ilin ilk 10 ayında ölkədə fəaliyyət göstərən bütün şirkətlərin mükafatlarının ümumi həcmi 282,14 milyon manat təşkil edib (il ərzində 57,53 faiz artım), hesabat dövründə ödənişlər isə 75,46 milyon manat (artım təxminən 55,49 faiz) olub.
Qeyd edək ki, Azərbaycan Maliyyə Nazirliyinin hesabatında AzRE yeganə təkrarsığorta şirkətinin fəaliyyətinin yekunları göstərilməyib.
