Azərbaycan, Bakı, 18 dekabr /Trend, müxbir E.İsmayılov/
Cari ilin yanvar-oktyabr aylarında Azərbaycana 62,7 minə yaxın minik avtomobili idxal edilib ki, bu da 2011-ci ilin analoji dövrü ilə müqayisədə 23,7 faiz çoxdur. Bu barədə çərşənbə axşamı Trend-ə Dövlət Statistika Komitəsindən məlumat verilib.
Məlumata əsasən, yanvar-oktyabrda idxal edilən minik avtomobillərinin ümumi dəyəri 603,65 milyon dollardan artıq olub. Bu isə ötən ilin yanvar-oktyabr aylarının göstəricisindən 18,4 faiz çoxdur.
Hesabat dövründə Azərbaycana 7994 ədəd yük avtomobili idxal edilib. Bu rəqəm 2011-ci ilin analoji dövrünə nisbətdə 69 faiz çoxdur. Ölkəyə gətirilən avtomobillərin ümumi dəyəri 185,65 milyon dollardan artıq təşkil edib ki, bu da ötən ilin analoji dövr göstəricisindən 79,8 faiz çoxdur.
Bundan əlavə, yanvar-oktyabrda respublikaya 894 ədəd avtobus idxal edilib ki, bu da 2011-ci ilin eyni dövrü ilə müqayisədə 76,3 faiz çoxdur. Həmin dövrdə ümumi dəyəri 44,52 milyon dollar olan avtomobil gətirilib. Bu rəqəm ötən ilin analoji dövr göstəricisindən 116,2 faiz çoxdur.