Azərbaycan, Bakı, 16 sentyabr /Trend, müxbir E.İsmayılov/
Cari ilin yanvar-avqust aylarında Azərbaycanda 326 minik avtomobili istehsal olunub ki, bu da 2012-ci ilin analoji dövründə qeydə alınan göstəricidən 2,7 dəfə çoxdur. Trend-in məlumatına görə, bu barədə Dövlət Statistika Komitəsinin hesabatında bildirilir.
Hesabatda qeyd olunur ki, yanvar-avqust aylarında respublikada 147 yük maşını istehsal olunub. Bu, ötən ilin analoji dövründə qeydə alınan göstəricidən 40 faiz çoxdur.
Minik və yük maşınları istehsalında olan artıma baxmayaraq, yanvar-avqust aylarında traktor istehsalında azalma müşahidə olunub. Belə ki, hesabat dövründə ölkədə 425 traktor istehsal edilib. Bu, 2012-ci ilin yanvar-avqust aylarında qeydə alınan göstəricidən 26,8 faiz azdır.
