Azərbaycan, Bakı, 21 yanvar /Trend, müxbir A.Axundov/
Azərbaycan Mərkəzi Bankının (AMB) banklar tərəfindən avtomobil kreditinin verilməsinə məhdudiyyət tətbiq etməsi ölkənin sığorta bazarına mənfi təsir edəcək. Bunu Trend-ə AMB-nin mövcud qərarını şərh edən bazar iştirakçıları deyiblər.
"Buta Sığorta" şirkətinin İdarə heyətinin sədri Abbas Babayev bildirib ki, bu dəyişikliklər İcbari Sığorta Bürosuna (İSB) daxil olmayan şirkətlərin fəaliyyətinə böyük təsir göstərəcək.
A.Babayevin sözlərinə görə, İSB-nin iştirakçı şirkətləri avtonəqliyyat vasitəsi sahiblərinin mülki məsuliyyətinin icbari sığortası (AVSMMİS) üzrə işləmək hüququna malikdirlər: "Şirkətlərin bu sığorta növü üzrə gəlirləri avtomobillərin könüllü sığortası üzrə itkiləri kompensasiya edə bilər".
12 şirkət İSB-nin üzvdür: "Paşa Sığorta", "Atəşgah" sığorta şirkəti, "Standard Insurance" sığorta şirkəti, "AtaSığorta", "Xalq Sığorta", "AXA MBASK" sığorta şirkəti, "Azsığorta", "Alfa Sığorta", "Azərsığorta" Dövlət Sığorta Kommersiya Şirkəti, "Meqa Sığorta", "İpək Yolu Sığorta" və "Azərbaycan Sənaye Sığorta".
Onun sözlərinə görə, bir çox sığorta şirkətlərinin biznesində, əsasən də avtonəqliyyat vasitələrinin könüllü sığortasında bank kreditləri əhəmiyyətli rol oynayır: "Avtomobil kreditləşməsinin həcmində istənilən azalma sığorta şirkətlərinin ümumi göstəricilərinə təsir edir, gəlirlərin azalmasına səbəb olur. Gəlirlərin belə planlaşdırılmadan azalması bu biznesə yatırılan investisiyaları səmərəsiz edir. İstənilən halda avtomobil kreditləşməsinin məhdudlaşdırılması sığorta şirkətlərinin maliyyə vəziyyətinə mənfi təsir göstərəcək. Məhdudlaşdırma bu və ya digər dərəcədə bütün şirkətlərin, o cümlədən Büroya daxil olan şirkətlərin işinə təsirsiz ötüşməyəcək".
"Standard Insurance" sığorta şirkətinin İdarə heyətinin sədri Mustafa Abbasbəyli bildirib ki, avtomobil kreditləşməsinin məhdudlaşdırılması bütün sığorta şirkətlərinin biznesinə təsir edəcək, lakin bu, 2008-ci ildə olduğu kimi fəlakətə çevrilməyəcək.
M.Abbasbəylinin sözlərinə görə, şübhəsiz ki, sığorta şirkətləri xüsusilə avtomobillərin kreditləşməsi sahəsində bankların fəaliyyətindən asılıdırlar: "2008-ci ildə dünya maliyyə böhranı zamanı banklar kreditlərin verilməsini dayandırdılar, sığorta şirkətləri ciddi itkilər verdilər. Yığımlar azaldı, işçilər arasında ixtisarlar aparıldı. Şirkətlər bundan sonra banklardan asılılığın zəiflədilməsi üzrə yollar axtarmağa, yeni məhsullar üzərində fikirləşməyə və s. işlərə başladılar. Bu istiqamətdə böyük işlər görüldü, asılılıq azaldıldı".
Qeyd edək ki, Maliyyə Nazirliyi yanında Dövlət Sığorta Nəzarəti Xidmətinin məlumatına görə, sığorta şirkətləri 2013-cü ildə avtonəqliyyat vasitələrinin könüllü sığortası üzrə 58,86 milyon manat yığıblar ki, bu da ötən il yığılmış bütün mükafatların 14,02 faizini təşkil edib. AVSMMİS üzrə isə bu göstərici 69,21 milyon manat (17,06 faiz) olub.
Azərbaycanda 28 sığorta və 1 təkrar sığorta şirkəti fəaliyyət göstərir.
