Azərbaycan, Bakı, 27 yanvar /Trend, müxbir E.Əliyev/
2013-cü ildə Azərbaycan və Gürcüstan arasında əmtəə dövriyyəsi 1,35 milyard dolları ötüb ki, bu da Gürcüstanın xarici ticarət dövriyyəsinin 12,5 faizini təşkil edir. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
İki ölkə arasında əmtəə dövriyyəsi 2012-ci illə müqayisədə 7,14 faiz artıb. Müqayisə üçün, 2012-ci ildə Azərbaycan və Gürcüstan arasında əmtəə dövriyyəsi 1,26 milyard dollar təşkil edib.
Azərbaycan Türkiyədən sonra Gürcüstanın ikinci ticarət tərəfdaşıdır.
Ötən il Türkiyə və Gürcüstan arasında ticarət dövriyyəsi 1,53 milyard dollar (xüsusi çəki 14,2 faiz) təşkil edib. Üçüncü yerdə isə 795,13 milyon dollar göstərici ilə Ukraynadır.
2013-cü ildə Gürcüstanın ümumi xarici ticarət dövriyyəsi 2012-ci ilə nisbətən 5,48 faiz artaraq 10,78 milyard dollar olub.
