Azərbaycan, Bakı, 10 fevral /Trend, müxbir E.Əliyev/
Azərbaycan Beynəlxalq Bankı (ABB) 2014-cü ilin sonuna islam aktivlərinin həcmini ikiqat artırmağı planlaşdırır. Trend-in məlumatına görə, bunu bankın İslam bankçılığı departamentinin rəhbəri Bəhnam Qurbanzadə "Azernews" qəzetinə müsahibəsində deyib.
Onun sözlərinə görə, hazırda ABB-nin islam portfelinin həcmi təqribən 200 milyon dollardır: "Bank 2014-cü ilin sonuna bu sahədə əməliyyatların həcmini ikiqat artırmağı və islam bank aktivlərinin həcmini 400 milyon dollara çatdırmağı planlaşdırır".
B.Qurbanzadə qeyd edib ki, Azərbaycanda islam bankçılığının sürətlə artmasına baxmayaraq, bazarın bu seqmentini stimullaşdırmaq üçün qanunvericilikdə islahatlara ehtiyac var: "İslam bankçılığı sahəsində qanunların qəbul edilməsi bu seqment və ənənəvi banklar üçün eyni şərait yaradacaq, həmçinin ölkədə islam bank məshullarının tam spektrini tətbiq etməyə imkan verəcək. Yeni məhsulların tətbiq edilməsi islam bankçılığının bazar payının artmasına və müştəri bazasının genişlənməsinə gətirib çıxaracaq".