Azərbaycan, Bakı, 11 mart /Trend, müxbir E.Əliyev/
2014-cü il fevralın 1-nə olan vəziyyətə görə, ölkə banklarının aktivləri 20 546,35 milyon manat təşkil edib. Bu rəqəm 2013-cü ilin yanvar ayında 16 419,05 milyon manat olub.
Trend Azərbaycan Mərkəzi Bankının statistik hesabatına istinadən məlumat verir ki, il ərzində bankların aktivləri 25,14 faiz artıb.
Bank sektoru aktivlərinin əsasını (69,2 faiz) müştərilərə verilən 14 210,5 milyon manat dəyərində kreditlər (il ərzində 31,5 faiz artım), investisiyalar (6,5 faiz artımla 1 704,6 milyon manat) və müxbir hesablarındakı vəsaitlər (4, 5 faiz artım ilə 1072,4 milyon manat) təşkil edib.
Maliyyə sektoruna verilən kreditlər və depozitlər 890,7 milyon manat (25,43 faiz artımla) olub.
Passivlər strukturunda əsas payı (44,58 faiz) 2013-cü ilin yanvar ayı ilə müqayisədə 20,7 faiz artan depozitlər (2014-cü il fevralın 1-nə 9 158,9 milyon manat) təşkil edir. Maliyyə sektorundan alınan kreditlər və depozitlər 30,1 faiz artaraq 6833,1 milyon manat təşkil edib.
