Azərbaycan, Bakı, 18 aprel /Trend, müxbir E.Əliyev/
2014-cü ilin yanvar-mart aylarında Azərbaycanda sığortanın icbari növləri üzrə yığımlar il ərzində 9,3 faiz artaraq 30,8 milyon manat təşkil edib, yığımların ümumi həcmində onların payı isə 27,65 faizdən 26,11 faizədək azalıb. Sığortanın bu növləri üzrə ödənişlər 2013-cü ilin analoji dövrü ilə müqayisədə 15,82 faiz artaraq 8,71 milyon manat olub. Trend-in məlumatına görə, bu barədə Azərbaycan Maliyyə Nazirliyinin 2014-cü ilin yanvar-mart aylarında sığorta şirkətlərinin fəaliyyəti haqqında hesabatında deyilir.
İcbari Sığorta Bürosuna daxil olan və sığortanın bu növləri ilə məşğul olmaq hüququna malik şirkətlər bu ilin yanvar-mart aylarında avtonəqliyyat vasitəsi sahiblərinin mülki məsuliyyətinin icbari sığortası üzrə 12,01 milyon manat məbləğində yığım həyata keçiriblər ki, bu da 2013-cü ilin analoji dövrünün göstəricisindən təxminən 0,42 faiz çoxdur.
Ümumilikdə icbari sığorta yığımlarının 38,99 faizi (ötən ilin eyni dövründə 42,44 faiz) və bu ilin yanvar-mart aylarında bazarda (ötən ilin eyni dövründə 11,7 faiz) toplanan bütün sığorta haqlarının 10,8 faizi sığortanın bu növünün payına düşür.
Bu ilin yanvar-mart aylarında avtonəqliyyat vasitəsi sahiblərinin mülki məsuliyyətinin icbari sığortası üzrə 6,05 milyon manat həcmində ödəniş həyata keçirilib ki, bu da ötən ilin eyni dövründəki göstəricini 21,24 faiz üstələyir.
Şirkətlər daşınmaz əmlakın və daşınmaz əmlakın istismarı zamanı vətəndaş məsuliyyətinin icbari sığortası üzrə müvafiq olaraq 3,33 milyon manat (bu növ üzrə ödənişlər 408,58 min manat) və 97,88 min manat (ödənişsiz) vəsait toplayıblar.
2014-cü ilin yanvar-mart aylarında Azərbaycanda həyat sığortası ilə məşğul olmaq hüququna malik üç şirkət - "Paşa Həyat", "Atəşgah Həyat" və "Qala Həyat" istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 9,84 milyon manat vəsait toplayıblar. Bu, ötən ilin analoji dövrünün göstəricisini təxminən 14,82 faiz üstələyir.
2014-cü ilin yanvar-mart aylarının yekunları üzrə Azərbaycanda fəaliyyət göstərən bütün şirkətlərin sığorta tədiyyələtinin ümumi həcmi 117,94 milyon manat (il ərzində artım 15,37 faiz), bu dövrdə ödənişlər isə 28,57 milyon manat (artım 12,49 faiz) olub.
Maliyyə Nazirliyinin hesabatında AzRE yeganə təkrar sığorta şirkətinin fəaliyyətinin yekunları göstərilməyib.
