Azərbaycan, Bakı, 16 may /Trend, müxbir E.Əliyev/
Bakı hotellərində nömrələrin qiyməti son 5 il ərzində 10 faizdən çox azalıb. Trend-in məlumatına görə, bu barədə "Azerbaijan Property Solutions" konsaltinq şirkətinin kommersiya daşınmaz əmlak bazarının vəziyyəti haqqında illik hesabatında deyilir.
Hesabata əsasən, 2009-cu ildən orta səviyyəli hotellərdə qiymətlərin ümumi səviyyəsi 10 faiz, "luxury" tipli hotellərdə isə 15-17 faiz azalıb: "Qiymətlərin ucuzlaşmasının əsas səbəbi bazarın sıxlığı və hotellər, xüsusilə yuxarı kateqoriyalı hotellər tərəfindən yüksək səviyyəli təkliflərin təqdim edilməsi ilə əlaqədardır".
Araşdırmada deyilir ki, 2013-cü ildə şəhərin hotellərində nömrələrin tutulması orta hesabla 60 faiz təşkil edib. Bu, beşulduzlu mehmanxanalarda 55 faizdən başlayır, üçulduzlu hotellərdə isə 65 faizədək olub.
Hesabata görə, paytaxtın hotellərinin ümumi nömrə fondu təqribən 6,4 min apartamentdən ibarətdir ki, bu da ötən illə müqayisədə 12 faiz çoxdur: "Bakının mehmanxana fondunun orta illik artımı təqribən 8 faiz səviyyəsində qiymətləndirilir".
Qeyd edək ki, hazırda Bakıda 103 hotel, o cümlədən 22 beşulduzlu, 46 dördulduzlu, 26 üçulduzlu hotel, həmçinin təsnifatdan kənar və ya dövlətin balansında olan 9 mehmanxana fəaliyyət göstərir.